ALT-i PAC, Dimapur police dang pelar

Dimapur, Yimpoksüi/November 29 (TYO): Aoyim Lanur Telongjem ya Aoyim Village Council kübok tentet tilaka lir, aser aikati iba telok indang mangashidang alitsü, ajisüaka tawa osangkakettem aser social media ajanga Naga yimtenren teloktemi Tenla ki tasenba yangluba nungia saru meshiba taoksatsü osang prokba ajanga iba tentet indang angshir alitsü, ta Aoyim Lanur Telongjem Dimapur, Nagaland Tir aser tongi tezülur nati sangdong ka ajanga metetdaktsü.
Anungji Aoyim Village sensotem tenüng nung Aoyim Lanur Telongjem-i Public Action Committee (PAC) of Naga Council Dimapur aser Dimapur Police-i asen Naga lokti nung ozüng alema saru saruba anema maneni meranga inyakba atema pelaba lemsateper, ta sangdong nung shia lir.
Iba dak alia Aoyim Lanur Telongjem-i PAC-i ochi temeden atema nokdakba nung nungittsü, iba denji külemi senso ajak dang asen lokti nung iba tebilemtsü kaktettsü atema onok nungita pusemtsü mepishia metetdaktsür, ta kasa sangdong nung shia lir.
“Ajak takoksang Tsüngemi asen Naga lokti lenitsü atema asen lenirtem nem anema aliba taküm den shisatsü moajang ta onoki sarasademtsür,” ta Aoyim Lanur Telongjem-isa metetdaktsüogo.