ANCSU-i ST atema tanüngba Post Matric Scholarship meshir

Kohima, Yimpoksüi/November 29 (TYO): Scheduled Tribe students’ nem Post Matric Scholarship (PMS) tanüngba sen magutsüi aliba atema All Nagaland College Students’ Union (ANCSU)-i state Angh nem shidi ka ajanga temepishiba agutsüogo, ta tanü ANCSU Tir, Katho P Awomi aser tongti tezülur, Vimeyiekho Vitso nati sangdong ka ajanga metetdaktsü.
ANCSU-i shidi ka ajanga Angh dang, “Scheduled Tribe students’ atema Post Matric Scholarship (PMS) asoshi ANCSU-i küm aika inyaka arudar, yamaji ANCSU-i maneni nü dang ya lepshia metetdaktsür- session 2017-2018 atema PMS (ST) ji tesadang ka dang agutsüogo, shilem 50%. Post-Matric Scholarship scheme kübok Ministry of Tribal Affairs Government of India-i 2017-2018 küm atema recurring grant-in-aid (ad hoc grant) 1st instalment sen 6,14,00,000/- (Crore trok ser lakh 14) agutsüogo. Ajisüaka 2018 küm November 17 nü tim ministry nem SIT report agutsüba sülen-a Ministry of Tribal Affairs-i tanüngba senji tang tashi melemzüktsür,” ta metetdaktsü.
ANSCU-isa Angh dang, “Sir, iba ama rabirtsüri inyakba ama benshiba ajanga kaketshirtem tazüngba jenjang amokmerener, aser iba timtem nung kaketshirtem kümzüktsüji nü dak tashi lir. Anungji onoki nü dang tiyongtsüi aita tim inyaktsü mepishir,” ta mepishia metetdaktsü.
“Sir, kaketshirtemi mapang talangka kanga aremzüka ataogo, aser state sorkari ministry dang nungi tanüngba senotsüji meshizüka magutsütetra kaketshirtemi parnok temeden atema raratsüsa akumtsü. Nai tekaraba nung tim mera agia inyaktsü aser telangzüba agutsütsü imlar,” ta ANCSU-isa metetdaktsü.