Government Primary School Shitilong Mongsenyimti küm 50 tain kümogo

Mokokchung, November 29: ‘Masetshiba nükmen” omen nung ajemdaker Government Primary School Shitilong Mongsenyimti hon jubileemung Brihostibarnü school premises nung kangadang longsoa mungogo.
Jubileemung sentong nung tongti O jembir L. Imthy Jamir, Mokokchung liasü. Pai “Masetshiba nükmen” onük nung ajemdaker jembidang lisem-ma nung asüba ki masü saka long ma nung asüba ki ama tzüsem yipru tesashi aruaka marakzüi tizüka nokdaktetba nüchi nisung kaka akümtsü ayongzüka liasü.Paisa tanur ka sozükli nungi arishi küm tenet tashi ya taküm ka asoshi taküm nükmen amentetba tongtibang shilem ka lir anungji school nung tesayurtem aser kidang tsüraburtemi parnok inyaksangshi aser jembishinü nung kangadang kümdanga anitettsüla, kechiyong tanur kati tangari inyakba mapatemji temlaba ajizüker ta ashi. Tongti O jembir-isa jubilee amungba den külemi nükmen takhang ka amenshir tejakleni alima den jangyu medema aotsü ajungshia liasü.
Jubileemung sentong meraketja demsemer Tongpang Ozüküm, Minister PWD, Govt. of Nagaland-ia Jubilee nüngu kaket sayatsü aser adenshia alirtem den tatsüka jembidang, küm 50 abensaba shisaliok riju ka ama tanur sayuyim aser inyaksangshi tapu ajak nung alima koleni aor itemji agizükteta anidaktsüla ta ashiba den tesayurtem danga kaket nung zülua aliba dak alaka ano talila shisatsü bendener tanurtem dang sayura kotasür alimai metettsüsa nübu tajung madokdaktsütettsü ta ajungshia ashi. Tongpang Ozükum, shiba lanuwa iba school nung züngdanga alir ka lir paisa jubilee anogo ya pelatepa benjungtepba kijaji masütsüla saka kati ka den tejen tejashitep aser mulungmachi alibatem ajak tai tokteper, len tasen ka piteta majang yangshiba mapang ka südaktsütsüla ta ayongzük.
Sentong nungsa K. Zülu Jamir-i ketdangsüa school nung inyakdanga aser züngdanga alirtem asür tanüla nem akümtsübu agüja sarasademja liasü. Iba den Putiwabong, President, Mongsenyimti Kaketshir Telongjem (MKT)-ia ‘Ibai tetenzüker ka’ onük nung ajemdaker jubileemungertem ayongzüka jembi.
Imlibenla PT-i ketdangsüa aniba sentong nung Sashipokla, Area Education Officer, Mkg; T. Yanger Ozüküm, Chairman VED aser M. Lima Ozüküm, Chairman Mongsenyimti Village Council nungeria tepela O tatsütsü jembia liasü.
Jubileemung tali meraketja Imtiwapong Ozüküm aser S. Chuba Ozüküm nunger telokia ken tajung ka aten aser Imlisongla, Teacher Incharge aser A. Kümzük Pongen, Convenor Jubilee Planning Committee natia tepela O jembia liasü.