Nagaland atema sen

India nung state shia terenlok mapatem inyaktsü nüngdakba asadanga senotsü lemzüktsütsü asoshi küm pongo shia Finance Commission ka shima inyakdaktsür. Taoba 14 buba Finance Commission nung taoba RBI governor Y.V.Reddy mendenbuba ser inyakba sentongtem 2020 nung temadoktsü aser 2020 küm 1st April nungibo 15 buba Finance Commssion-i inyakba mapatem tenzüktsü aser 31st March 2025 tashi nung atemtsü. Iba Finance Commission yagi linük atema aruba senotsütem amshia center, state aser local bodies nung kechisa koma inyaktsü itemji tetuyuba agüja senotsü lemsatsütsü. Küm pongo shia Finance Commission ajanga senotsü lemsatsüba ya mapang shitak nung tenzüka otettsü atema iba Commission ya küm ana jelia shimer. Aji oda, tang 15 buba Finance Commission-a yamaji N.Kishore Singh mendenbuba ser taoba küm nungi inyaka aruba tang Nagaland state tonga aruogo. 2020 küm nungi state asoshi sen lemzüktsütsü purtem arur asünungji state government-i akok tashi parnok peladakja mongdaktsütsü asoshi sentong tajung balala atonga inyakba nguogo. Parnok orr külen parnoki komaka inyaktsütsüar ajibo parnoki dang metet saka 15 buba Finance Commission purtemi yakanü Kohima nung metetdaktsüba apibo, state government-i nüngdak asoshi meshiba senotsü ajakji peria agütsütsüla amai shiogo. Tajung kaji state government-i senotsü nüngdaka meshibatem rongnung lenmang, light, education aser medical  asoshiang senotsü tenüngdakbasa meshia lir. Itemji jungra tanga department kübok inyaktsü aliba mapatemjia jungadoktsü. Iba tangatetba nung yimten nung yimsüsür aser ketdangsertem rongnung asentenshi adoka 2020 küm nungibo senotsü sentong tasenba tenzük metetmeteta Nagaland renloktsü imlar. Asenoki küm shia arogo nung asentenshi sentong ayongzüka akar saka yimten aser lokti nung temelenshi tajung aruba kangabo mangur. Ibaji kodang jungjunga bilemdangdir, asentenshi ya arogo nung dang masü saka tatar senden nungang tenüngdakba ta reprangteter. Tatar senden nung asentenshi madok tashi aser tatartem aser ketdangsertem temulung meyipa nübortem tajungba nung tenzüktsü memulungtet tashi Finance Commission noklangbenbuba aru tashia asen lima merenloki alitsü. Tanü Nagaland merenloktetba ya sen agi meperiba ajanga lir. Ajisüaka, asenok sen agi meperibaji linük nung sen makaba agi masü aser center nungi sen peria meyokba agia masü saka asenoki shitak meinyaker. Asenoki mapa tila nungi tenzüka sentong ajak shitak inyaka aotsüba nung tezüdanga bilemer. Iba jagi aiben yimsüsür aser ketdangsertemi project tilabo teinyak malang, anungji crore aika jenjang dang project yanglur center nem agütsütsüla ta jembir. Tetezü, project tulu yanglua inyaktsü amai sayubaji shitak inyaktsüba masü saka iba nung jagi sübokrem mesüra commission sen aika angutsü tebilemba nung inyaker. Tang tashi nung, Nagaland dang nungi tesü state angur kidanger state-tem renlokba tiaji reprangdangra, Nagaland denbo asadangteptsüla masü parnoksa tajungba aser tejakleni taoba angur. Tanga state-bo yutsür Nagaland ajanga aoba state Manipur renlokba reprangdangra Nagaland dang nungibo noklangben agi tali renloker angutsü. Imphal yimtiji Delhi yimti amai dang kümogo aser Medical College, Engineering College aser Sports stadium dang masü saka joko Sports Univeristy tashi lapoka odagi. Gair lenmanga par lima nungsa tajungba aser tayimtsübo ghonda nung kabo yimketa atur. Asenoki parnok tiaji reprangdangra, Naga nungertem dang nungibo Manipur (Meitie) nunger telong nung alir teloksa teimba, anungji Manipur nunga tashiyim agi sen saruba aser timtem agütsüba tebilemtsütem lir. Ajisüaka, Manipur-bo renloker saka Nagaland-bo merenloker. Itemji kodang asenoki bilemdangdir, Nagaland merenlokba aser majungba akümba yabo telong nung alirtemi masü saka tema nung alirtemi raksar ta angatetter. Joko, telong nung alirtem nüngku ojang bentettsüdi aser 15 buba Finance Commission-i lemzüktsüba rongsen amshi metenzükdangsa tema nung alirtem ajak ochishia aser shitak inyaktsü asoshi temulung meyipmadi.