SBI Kohima nung mezüngbuba HNI/Forex counter lapok

Kohima, Yimpoksüi (November) 30 (TYO): Nagaland nung mezüngbuba High Networth Individual (HNI) aser Foreign Exchange (Forex) counter lapokbaji SBI Kohima, Main Branch nung asütsü.
Tanü Nagaland Additional Chief Secretary Temjen Toy-i Chief General Manager, SBI North Eastern Circle, Suni Kumar Tandon aser General Manager, NW-II, SBI North Eastern Circle, Digmanu Gupta nungertem lia iba counter lapoktsü.
“HNI kübok banking services agitsüpur customers nem iba service tenzüktsür. Counter ka nung personalised staff-i customer nüngdakba atema yariteptsü,” ta Tandon-i ashi.
“Kohima branch nung foreign travel card with multi currency options, Foreign currency sale and purchase, foreign trade transaction with mercury facility tem angutsü,” ta paisa shisem.
Chief General Manager-i customer tem dang ATMs mashi mamshitsü aser nisung shinga dena pincode aser one time passwords (OTP) melemsateptsü atema mepishia metetdaktsü.
Ashikülakertemi bank nungi phone asür ta shia customers külaoktsütsü meranger anungji iba ama phone arura bank den indangindanga tongtepratepang, ta paisa shisem.