Dimapur nung auer aser nisungpurtem apu

Dimapur, September 9 (TYO) : September 7, 2015 anepdang 3:30 ako meta Dimapur East P.S nungi police temi LPG cylinder auyar ka apu.
Iba nisung ya Niboto Zhimo lir aser pai Veterinary colony, Burma camp, Dimapur nung LPG cylinder auyaba atema police-i pur police station-i aodang pai gari nungi jokzüker jena aotsü merang saka pa tanaben apu, ta Addl. Dy. Commissioner of Police/PRO Dimapur-i sangdong ka nung metetdaktsü.
Iba dak sendakba nung East PS nung ken o ka benokogo, ta sangdong nungsa shia lir.
Ano, September 1, 2015 nü Netaji colony, Dimapur nung alir tetsür chanu ka samaba FIR benok.
August 31 anepdang 6:00 ako meta la Railway colony, Dimapur nung tuition agitsü atema aoba sülen sama ta FIR nung shia liasü. Iba ken o benoker bushisüngdanga aodang September 7 nü temulung melemi bilemba nisung ka Khatkhati, Assam nung apu.
Iba nisung ya Silchar, Dist. Cachar (Assam) nungi Panna Dey ta jangjaogo aser pa dang asüngdangya asüdang pai tanutsülaji pur Silchar (Assam) nung yua lir ta nangzük, ta Dimapur police sangdong nung metetdaktsü.
Police-i tanutsüla kümzüker Dimapur toga anir aruogo aser Dimapur East PS nung ken o ka benoker maneni bushisüngdang südar, ta sangdong nungsa shia lir.
September 8 nü Women Cell Dimapur police-i Md. Ali Ulla ta ser nisung ka pua lir. Iba nisung ya Nagaon, Assam nungi lir aser pai tetsür tanur ka Dimapur nung teküp ayokba mapa asoshi yokdoktsü lia kümzükogo. Iba dak sendakba nung bushisüngdang südar aser tanutsülar tsürabur metettsü atema bushitepdar, ta Addl. Dy. Commissioner of Police/PRO Dimapur sangdong nungsa shia lir.
Ano, September 6, 2015 nü GRPS-i Rajesh Das ta ser nisung ka apu aser pa ket nungi Spasmo Proxyvon süngjang 26200 aser Nitrosun süngjang 900 apu. Iba dak sendakba nung GRPS nung ken o ka benokogo, ta Dimapur police sangdong nungsa metetdaktsü.