Kiralongra, senotsü nung aibelen na ya amokmeren lir: PM Modi

Buenos Aires (Argentina), Luchii/December 01 (Agencies): Buenos Aires (Argentina) nung G20 senden aliba mapang jurila senden ka nung India Ato kilonser, Narendra Modi-i, tang alima nung amokmeren tulutiba anaji kiralongra aser senotsü nung aibelen na lir, ta metetdaktsü.
BRICS züngsem linüktem nungi lenirtem senden nung Modi-i, alima linüktemi kiralongra aser senotsü nung aibelen na anema longjemer raratsüla, ta ashi.
“Kiralongra aser alia oa inyakbaji alima atema amokmeren ka lir. Senotsü nung aibelenertemjia amokmeren tulu ka lir. Black money anema asenoki longjemer inyaktsüla,” ta pai ashi.
Alima nung terenlokdak linüktemi longjemtsüla, ta shia Modi-i kasa alizüng yur inyaktsü ayongzük.
“UN aser multilateral organizations nung terenlokdak linüktem atema asenoki obang ka ser jembitsüla. Ibayongji BRICS atema asenok longjem,” ta pai ashi.
BRICS züngsem linüktemji Brazil, Russia, India, China aser South Africa lir, aser G20 (Group of 20) tentet nung UK, US, EU, France, Germany, Indonesia, Italy, Japan, Mexico, Saudi Arabia, South Korea, Argentina, Australia, Canada aser Turkey linüktema densema lir.
G20 Summit 2018 mapang nung Modi-i Saudi Crown Prince Mohammed bin Salman Al Saud, Chinese Ato kilonser, Xi Jinping aser UN Secretary-General Antonio Guterres nunger ajuruogo.