Rajya Sabha nung Anti-trafficking Bill agizüktsü imlar: Maneka

New Delhi, Luchii/December 01 (Agencies): Tanü Women & Child Development Union Minister, Maneka Gandhi-i, asükwa mongpu Parliament senden alidang Rajya Sabha nung anti-trafficking bill agizüktsü imlar, ta metetdaktsü.
Iba bill ajanga, nisung shibelenba ajanga takoksa angurtem, kuli agutsürtem aser ken o agutsürtem maitsü miima ayutsü aser mapang atemzüker ken o akaba den takoksa angurtem pei kidangi shilangdaktsütsü.
Osangbenertemi taruba Parliament dak sendakba nung asüngdangba ka langzüdang Maneka-i, “Anti-trafficking bill agizüktsü atema onoki yongyar. Lok Sabha-ibo iba bill agizükogo aser Rajya Sabha nunga agizüktsü ta ni imlar,” ta metetdaktsü.
Taküm July ita nung tzüngluruwa mongpu Parliament alidang Lok Sabha-i Trafficking of Persons (Prevention, Protection and Rehabilitation) Bill, 2018 agizüka liasü.
Maneka Gandhi-i, iba bill ya pei mang ayoker tetsürtem anema masü, saka nisung shibelenertem anema lir, ta ashi.
Iba bill ajanga district, state aser central levels nung rejutem amenoktsü aser aibelenertem atema temerenshiji tepoukdak küm 10 tashi ayutsü aser tajemba agi senchi lakh 1 achitsü benoker.
Kasa bill ajanga nisung shibelenba nokdangtsü, kümzüktsü aser teyari agutsütsü, iba dak alia kangshia mapa inyakdaktsüba, meshimetsüdaktsüba aser kangshia kibong kümdaktsüba anema inyaktsü.
Tanü Indira Gandhi National Centre for the Arts, New Delhi nung ayongzükba sentong ka nung Union Minister Maneka-isa school tanurtem den lai züluba kaket tasen ‘There’s a Monster Under my Bed! and Other Terrible Terrors’ indang lemsatep, iba kaketji sangküm January ita nung sayatsü.