India nung HIV agi shiranger tanur-tainlonglong 1,20,000 lir

United Nations, Luchii/December 01 (Agencies): 2017 küm India nung HIV keta alir tanur aser tainlonglong (arishi küm 0-19) 120,000 shi liasü, aser ibaji South Asia nungbo timtiba asutsü, ta UNICEF-i metetdaktsü.
Iba tashidak nokdangtsü atema meinyaktetra 2030 küm tashi nungbo alima nung AIDS agi anogoshia tainlonglong 80 shi asutsü, ta kasa osang ajanga metetdaktsü.
Tanur, tainlonglong, mashisa tetsürtem aser tetsütem dak HIV ajema akumtsü atema South Asia nung junga inyaktetogo, ta parnokisa metetdaktsü.
2017 küm India nung arishi küm 0-19 tsüngda tanur-tainlonglong 120,000 shi HIV keta liasü. Pakistan nung item zünga tanur 5,800 shi HIV keta liasü, Nepal nung 1,600 aser Bangladesh nung 1,000 den tekübok dak HIV keta liasü, ta UNICEF indang report ‘Children, HIV and AIDS: The World in 2030’ ajanga metetdaktsü.
2010 küm den medemdangra 2017 küm tanur arishi küm 5 ser tekübokpur dak HIV putetbaji shilem 43 agi tajemba liasü.
2017 küm arishi 0-14 pur HIV keta alirtem shilem 73-i antiretroviral therapy (ART) agi, aser 2010 küm den medemdangra shilem 50 agi timbai ART agiogo.
Ajisüaka report ajanga ashiba agi, HIV menatepba menokdangtetra 2030 küm tashi nungbo alima nung AIDS tashidak agi anogoshia tainlonglong 80 shi asütsü.
Kasa osang ajanga ashiba agi, AIDS dak sendakba agi nisung asüba aser iba tashidak menatepba kanga ajema kümdar, saka imlaba ama majemer, ta UNICEF tongti, Henrietta Fore-i metetdaktsü.
Tesüiba küm 8 nung tetsü dak nungi tanur nem HIV menaloktsüba shilem 40 agi tajemba kümogo, ajisüaka HIV keta alir tainlonglong rongnung shilem asemsü nungi shilem anabo tetsürtem lir, ta kasa osang ajanga metetdaktsü.
Tang alima nung arishi küm 0-19 tsüngdapur million 3 dak HIV keta lir, ajisüaka alima linüktemi alizüng yur inyakra 2030 küm tashi nungbo nisung million 2 HIV menatsü aliba nokdangtettsü; iba tetezü HIV nokdangtsü atema inyaktsüla, anepalutsüla, treatment services agutsütsüla aser tendangtsütsüla.