India, Russia, China 2buba Trilateral senden aka

Buenos Aires, Luchii/December 1 (Agencies): G-20 summit mapang lenla balala nung tesendaktep asoshi Ato Kilonser Narendra Modi, Chinese premier Xi Jinping aser Russia tir Vladimir Putin nunger Rogonü trilateral senden ka kaogo, koba küm 12 sülen tang linük asem tsüngda mezüngbuba senden akar asütsü.
Russia-India-China senden ya Ato Kilonser Modi, Japan Ato Kilonser Shinzo Abe aser US tir Donald Trump nung mezüngbuba trilateral senden amenba sülen ghonda ishika lir mena liasü.
“Tesendaktep tali takangba kümshidakja, Tir Vladimir Putin, tir Xi Jinping aser PM @narendramodi nunger RIC (Russia, India, China) trilateral senden nung shilem agiogo,” ta PM office ajanga tweet asü.
“2buba Russia-India-China ‘RIC’ Trilateral Summit küm 12 sülen Buenos Aires nung kaogo. Senden nung alima yimjung aser jenjang masetshiba nung teyari agütsütsü asoshi lenla balala nung lenirtem tsüngda sensaksemogo,” ta External Affairs Ministry otongdar Raveesh Kumar-i Twitter ajanga metetdaktsü.
Iba senden mamendang India, Japan aser US-i alima nung tibilemtsü tongtibangtem benoka sensaksemogo aser iba den arok tejangraba aser tebilemtsütem benoka jembiogo, koba China-i Indo-Pacific tesem amokbangtsü merangba mapang ka nung kanga tongtibang liasü.
Senden nung India-i Indo-Pacific tesem ya rongsen ketsüng nung ajak ajangzükba tesem ka kümdaktsütsü nangzük.
India-i ajak ajungtsü mechi inyaktsü ta tenangzükba agütsüba den Modi-i ashiba agi, “Linük asem; Japan, America, aser India acronym reprangdangra ‘JAI’ li koba Hindi nung takok dang ajar.”