Agri Department-i Director Ikuto den tepila sentong agi

Yimpoksüi/November 30, 2018 nü Directorate of Agriculture, Kohima nung Agri Department-i mapa nungi anisüngzüker dIRECTOR, G. Ikuto Zhimomi den tepila sentong agiba sülen pa den Principal Secretary & APC, Imkonglemba Ao, IAS aser tangartem tangokba noksa nung angur.

Kohima, Luchii/December 01 (TYO): November 30, 2018 nü Agriculture Directorate Conference Hall, Kohima nung Department of Agriculture-i mapa nungi anisüngzüker Director, G. Ikuto Zhimomi den tepila sentong ka ayongzüka agiogo, ta tanü ketdangsertem osang ka ajanga metetdaktsü.
Tepila o jembidang Director, G. Ikuto Zhimomi-i, pa 1987 küm Department nung join asü aser pa küm 35 tenzükba wadang nung alidang pai tejangraba tulu nung menden balala nung nüburtem melungsüa tenzükogo, aser ibaji department nung ketdangsertem aser staff temi amalitepa inyakba ajanga lir, ta metetdaktsü.
Paisa department dang nüburtem, talisa aluyimertem tajungtiba nung nendaka tenzüktsü aser dept-i jenjang tajungba alangzüktsü ayongzük.
Paisa establishment 42 aliba districts 11 dang Directorate den amalitepa inyakba aser maparen balala junga benoka inyaktetba atema pelaba lemsatep.
Paisa Agriculture Minister G. Kaito Aye-i amalitepa inyakba aser Principal Secretary & APC Imkonglemba Ao, IAS-i maneni nungita department leniba atema pelaba metetdaktsü.
Paisa state nüburtem tenzüktsü atema Nagaland sorkari pa nem maongka agutsüba atema pelaba lemsatep.
Sentong tembangba sülen pai Department indang official news bulletin (Agriculture News Letter 2017-2018) sayaja liasü.
O tatsüka jembidang Principal Secretary & APC, Imkonglemba Ao, IAS-i Director lenisüba nung department-i maparen balala takok ngua inyaktetbatem metetdaktsü.
Paisa ketdangsertem aser staff tem dang longjemer inyaktsü ayongzükba den mapa nungi anisüngzüker Director taküm anema lia mapa nungi anisüngzükba atema pa nem tenüngsang agutsü.
Director-i tenzüka aruba indang metetdaktsüdang Agri Jt. Director, S. Kivikhu Achumi-i, Director inyakba mapang nung schemes aser programmes aika takok ngua inyakogo aser ATMA-i districts 11 den sub-divisions ajak ayimjemogo, RKVY mapa küma benok aser DAP & SAP den Year of Farmers 2006 to 2007 renem, aser iba mapang nung pa nem Governor’s Commendation Award agutsü, ta metetdaktsü.
Kasa sentong nung Additional Director C. Peter Yanthan-i, mapa nungi anisüngzüksang Director ya kanga ajemalu aser Tsüngrem tsübuba nisung ka lir, ta ashiba den külemi taküm anema lia küm 35 tashi tenzüker anisüngzükba atema tenüngsang agutsü.
Ministerial staff tem tenüng nung Registrar, Vilaseno-i jembi, Directorate ketdangsertem aser Staff temi tepila ken ka aten, aser outpost establishments tenüng nung DAO Wokha, Santsü Kithan-i jembia liasü.
Kasa sentong nung Director Land Resources & Jt. Director Jacob Yanthan-ia o tatsüka jembi aser Er. Achakbou Newmai S.E.(Agri)-i tatem küma sarasadema liasü.
Iba sentong ya Director tasenba, Ben Yanthan leniba nung agi.