China nunger Snooker asayar ana asaya nungi nokdang

London, Luchii/December 1 (Agencies): China nunger snooker asayar Yu Delu aser Cao Yupeng na match-fixing dak sendakba nung iba asaya nung shilem magitsü tenokdangba agütsüogo. 2013 küm England nunger asayar Stephen Lee küm 12 asaya nungi nokdangba sülen Yu Delu küm talangba nokdangogo.
Küm anaser tesadang tsüngda asaya pongu tashi fix sür asayaba putetba sülen Independent tribunal kati arishi küm 31 tain Yu, küm 10 ser ita 9 asaya nungi nokdanga liasü.
Arishi küm 28 tain Cao küm trok asaya nungi nokdangogo aser küm asemser tesadang yabo pai tai nangzükba atema taitoka liasü. Pa asaya asem fix sür asaya putetba sülen iba temerenshi agütsü.
World Professional Billiards and Snooker Association (WPBSA)-i ken o bushisüngdangba sülen tribunal-i iba telemtetba agia liasü.
“Cao Yupeng-i pa tai nangzükogo aser pai ochi mashiba anema asayartem nem tangazükba balala agütsüba nung WPBSA nem teyari agütsütsü,” ta WPBSA mendenbuba Jason Ferguson-i ashi.
“Item asayar nem iba temerenshi agütsüba ajanga WPBSA-i iba amala ken o süoki ia agiba sayur. Iba ken o kanga saka bushisüngdangogo aser iba atema Tribunal-i WPBSA tenüng asanger,” ta paisa ashi.
Snooker ya China nung kanga sapua repranger aser iba ya Ding Junhui ajanga lir, shiba Asia nunger rongnungi 2014 küm mezüngbuba world No. 1 küma liasü aser iba sülen lanur asayar aika anidakogo.
Iba asaya China nung kanga nüngtugu akümba ajanga Yushan County nung menden 4,000 inoka arena ka yangluogo.
Yushan nung World Open ayongzüka kaogo kong senpet USD million 1 shi agütsür.