Bindra ISSF Blue Cross agizüker mezüngbuba kümogo

New Delhi, Luchii/December 1 (Agencies): International Shooting Sport Federation’s Athletes Committee mendenbuba ama maparen takok ngua bener aoba atema India nunger Olympic aser world champion shooter Abhinav Bindra nem sport nung temaba sempet agütsüogo.
Arishi küm 36 tain Bindra ya India nunger rongnungi Olympic nung gold medal angur pa kija lir aser pa nem ISSF indang temaba award, Blue Cross agütsüogo.
“Tanü Munich nung General Assembly mapang @ISSF_Shooting atema tematiba sempet, Blue Cross agizükba atema kanga pelar,” ta Bindra-i tweet asü.
Bindra melena iba menden atema America nunger shooter Kimberly Rhode shimogo.
2008 küm Beijing Olympic mapang 10m air rifle asaya nung gold medal ngua otsü tasen yanglusang ya 2010 nungi 2014 tashi ISSF Athletes Committee züngsem liasü aser 2014 nungi 2018 tashi mendenbuba ama inyakogo.
Pai iba mapa bena aliba mapang pa nem President’s Button aser Diploma of Honour, 2016 Aenjeti/Jan nung agütsüogo.
Pai mendenbuba mapa bener aliba mapang nung committee-i alima ajunga nung shooter tem ajangzükdaktsütsü asoshi Athletes Handbook ka yanglua adoktsüogo.
General assembly mapang National Rifle Association of India tir Raninder Singh nem ISSF diploma of honour gold medal agütsüogo.
Pa nem diploma aser medal ya ISSF tir Olegario Vazquez Rana-i agütsü, shibai iba menden küm 38 tashi bener liasü.
Iba award asoshi tepela lemsatepba mapang Singh-i “Rana lenisüba kübok iba asaya kanga renlokogo aser pa melenzüker asoshi pa menepa inyaktsü mapa tasak asütsü,” ta ashi.
Paisa, “ni iba sempet ya NRAI team ajak tenüng nung agizüker, shirnoki India nung iba asaya terenlok asoshi anibelem mesasai inyakogo iba den külemi ano India sorkar aser ajak dak alaka linük nung shooting fraternity tenüng nung iba sempet agizüker,” ta ashi