Pakistan-i kiralongra anema meinyaktetra India teyari meshitsüla: Rajnath Singh

Jaipur (Rajasthan), Luchii/December 02 (Agencies): Tanü Union Home Minister, Rajnath Singh-i, Pakistan-i kiralongra anema meinyaktetra parnoki India dang nungi teyari meshitsüla, ta ashi.
Paisa, tesüiba küm pezü nung Narendra Modi-i aniba NDA sorkar yimsüsüba mapang nung linük nung kiralongra dak sendakba tatalokba kecha mali, ta ashi.
“Ni Pakistan Ato kilonser (Imran Khan) dang ya shiner, Aghanistan nung US teyari agia kiralongra aser Taliban telok anema raratetba ama, Pakistan-ia kiralongra anema meinyakatetra parnoki India dang nungi teyari meshitsü akok,” ta paisa metetdaktsü.
Tanü Jaipur nung osangbenertem senden ka nung jembidang Singh-i, Jammu and Kashmir ya tebilemtsü ken o ka masü, kechiyong iba ya linük shilem ka lir, ta ashi.
“Ken oji kiralongra lir, aser Pakistan-i iba atemaji jembitsü akok,” ta pai ashi.
Home minister-isa, Congress-i yimtenren nung melung melemtep adokdaktsür aser Congress-i jembiba o inyakba naji balala, ta aitsü.
“Kiralongra anenogo, ta ni mashir, ajisüaka tesüiba küm pezü ser tesadang nung linük nung kiralongra dak sendakba tongti kecha matalok,” ta Singh-i metetdaktsü.
Kiralongraji Kashmir kija nung lir, ajisüaka yangji tensa tajungba kümdar, aser Panchayat elections-a takok ngua agidar, ta pai ashi.
“Sorkari Jammu & Kashmir ya yimtenren inyakyim nung dendaktsüogo. Kiralongra dak sendakba nung, item ya Pakistan-i sponsor süa inyakba lir, ta tejangja” ta Home Minister-i ashi.
Paisa, linük arrtsütem kümzüka lir aser kiralongra ajema akumba den taruba küm asem tsüngda Maoists tembangtsütsü, ta metetdaktsü.
Tesüiba küm pezü nung Maoists dak sendakba tatalokbatem shilem 50-60 ajema tamalen parnoki district 90 nung timtem agüja aliba tangbo district 8-9 nung dang iba tebilemtsü lir, ta paisa shisem.