Mikiyas-i Hornbill Half Marathon kokogo

Dimapur, Luchii/December 2 (TYO): Ethiopia nunger asemteper Mikiyas Yemata-i 8buba Hornbill Half Marathon kokogo, koba Civil Secretariat, Kohima nung Luchii/Dec 2nü kaa liasü. Pai ghonda 1, minute 12 ser second 51 nung alizüng tongteta liasü.
Taoba küm iba asaya akoksang I. Mosa Chang tanabuba jenjang nung tembang. Pai ghonda 1, minute 13 ser second 16 nung alizüng atong. Hempao M tasembuba jenjang nung liasü.
Arishi küm 26 tain Yemata-i taoba mapang nung Bangaluru Marathon aser Tura Half Marathon kokogo. 21.097 Km Hornbill Half Marathon nung tang mezüngbuba pai shilem agiogo. Pa tajangshibatem lemsatepba mapang Yemata-i ashiba agi, “Iba asaya nung tokteptsü asoshi junger saka altitude kanga high asüba agi tasak aser lenmanga kanga tasak lir. Iba tesem nung aliba asayartem kanga tashi tait lir. Taruba küma shilem agitsü asoshi jangraa bilemba lemsatepa pai ashiba agi, “Ni tenem lima nung training agir arutsü, ajita mesera iba tesem nung tokteptsü kanga tasak lir.”
Maneni pa training indang jembidang pai ashiba agi, “ni Ethiopia nung sports club ka nung lir aser anogo shia anepdang km 12 nungi 13 tashi aser nikongtsütsü km 7 nungi 8 tashi asemer.” Pa taruba küm Summer Olympics nung tokteptsü asoshi nükjidong lir.
Asemteper ajak agi parnok 133-i shilem agiogo aser parnok rongnung Ethiopia nunger asem densema liasü. Iba asaya akoker nem senpet sen 50,000 agütsü aser 2,3 aser 4buba nem senpet sen 20,000, 10,000 aser 5000 den kuli kaket agütsüogo.