Mkg nung Autocross, Motocross aser Auto Expo sentong agitsü

SMI züngsemtemi osangbenertem den Imkongmeren Sports Complex nung senden ka amenba sülen agiba noksa ka yangi angur.

Mokokchung, September 09 (TYO): Mokokchung tenteter küm 125 ajungba nüngtem nung Spearhead Motorsport Initiative (SMI) teloki Autocross, Motocross aser Auto Expo densemba ‘Throttle Thrust 2015’ tetoktepba sentong ka ayongzüka yangi Mokokchung kübok Imkongmeren Sports Complex nung September 11-12 nü agitsü renema lir.
SUV, 1000 CC ser tema, 1000 CC ser tekübok, Jeep cross aser Motocross telemsa nung 1 buba, 2 buba aser 3 buba jenjang angur nem senpet sen balala agütsütsü asoshi tayongeri renemba osang angazükogo.
Parnokisa ashiba agi, SUV tetoktepba nung temaba jenjang 3 angur nem senpet sen 25,000, 20,000 aser 15,000 agütsütsü. 1000 CC ser tema tetoktepba nung takok angur nem senpet sen 20,000, 15,000 aser 10,000 agütsütsü. 1000 CC ser tekübok shilem nunga senpet sen 15,000, 10,000 aser 5,000; Jeep Cross shilem nung senpet sen 5000, 3000 aser 2000 agütsütsü. Ano Motocross (open) shilem nung takoker nem senpet sen 20,000, 15,000 aser 10,000 aser Motocross (Novice) shilem nung takok angur nem senpet sen 15,000, 10,000 aser 5,000 agütsütsü renemogo. Senpet sen den ano takok marok aser kulikaketa renemja lir.
Tanabuba anogo nung Polaries, Nili Nissan, Ayida Honda, Okusa Toyota aser Lozi Hyundai nunger densemba company 5-i pei teloki tawa tasen adokba garitem sayua Auto Expo sentong agitsü.
Iba ama gari sayuba sentongji Mokokchung nung ibai mezüngbuba agir asütsü.
Item company-tem jagi pei garitem tendanga anishitsü maongka agütsütsü saka Polaris telokibo par gari anishidangba taa sen agitsü renemba osang tayongertemisa metetdaktsüogo.
Ano, gari tasen alizüktsü jangrartem nem IDBI, SBI, ICICI, HDFC aser Baroda bank-temi gari alitsü sen aputsütsü mulunga lir ta parnokisa shisem.
Polaris company-i Autocross tetoktepba nung takok angurtem nem sen 80,000 jenjang aketba ‘gift hampers’ sempeta renemja lir ta parnoki ashi.
“Iba sentong nung Delhi, Assam, Meghalaya aser Nagaland nungi tajemba agi nisung 70 shi shilem agitsü imlar,” ta tayongerisa metetdaktsü.
“Autocross ayongba mapang town nung alirtemi tejangra nung gari mashi-mashi manidaktsüner,” ta tayongertemisa lendong majurutsü asoshi nüburtem dang tekümdangtsü olen ka mepishia metetdaktsü.
Nagaland National Highways, Mechanical Engineering & Elections Minister, Nuklutoshi-i September 11 anepdang 10:00 ako nung iba sentong ya Imkongmeren Sports Complex nung tenzüktsütsü renema lir ta osang ajanga metetdaktsü.