Melangzüba tasüngdangba (T.Ken 77:7-10)

Langzütsüba dang nungi asüngdangtsüba temelaba. Item tekongtem nung tasü mait nisung kati tasüngdangbatem asüngdangba angur. “Kibubai teti asoshi ni sentokdi ma? Pa taochi teti asoshi oadokogo ma? Pai nangzükba joko amajok asü? Pai ain adoka pai taochi shibangogo ma?” (t.7-9). Aser tatem nung yamai ashi, “Ya ni tashi maitba; saka tematiba teka tajichilen aliba mapang ni bilemtet” (t.10).
Kodang asenok timtem ajanga odir asenoki yimya agi tasüngdangbatem asüngdanger. Dawid sarasadem, “Kü Tsüngrem, kü Tsüngrem, kechiba nai ni sendoker?” (T.Ken 22:1). Yisuia kangki nungi iba o jembi (Matt. 27:46). Kodang asenoki timtem ajanga odir, asenoki Tsüngremi yaritsü aser kümzüktsü imlar. Aser kodang kümzüktsü atar asenoki maremzüker. Iba mapang nung tasüngdangba asüngdanger.
Tsüngrem dang ochi shia ashitsü tsübua teli. Pa dang ne tebilembatem shiang. Pai na anemsü mesüi ochishia lidaktsüner. Saka ya bilemtetang: Khristan ama, asenoki rasaa ashiba nung masü; tenangzükbatem nung asenok alir. Tatishitsü agi, Tsüngremi iba tasüngdangba langzütsü tenzük. Kibubai teti asoshi sentoktsü asü? Masü. Pai ojang aochitsü asü? Atangji, Pai maongka sayutsü Pa taochi teti asoshi oatoker asü? Masü. Tsüngremi item tasüngdangbatem ajak langzüra balaka asütsü asü? Ne mulung tera süneptsü akok, saka tiajibo memelenshir. Tamang ajanga liang, tanguba agi masü. Kibuba tenangzükbatem nung amangang. Pai memelenshitsü.
Tsüngremi ne timtem nung tetibo ratetta mashitsü, saka Pai pa o tenangzükbatem agütsür. Na teimla makai tasü mait akümdang, sarasadem nung ne tasüngdangbatem Pa dangi bener arung, Pa o tenangzükbatem nung temulung lemang. Tsüngremi ne nüngdaktem metet aser itemji agütsütsü.