Hornbill benjung nung nisung 11497 aden; Sobaliba sentong meraketa agi

December 3, 2018 nü  Naga Heritage Village, Kisama  nung sobaliba sentong agidang Aor yartsüngsangertem (abelen) aser telok kati Naga nunger mi apuba sayudang agiba noksa angur. (Kisama, December 3)

Dimapur, Luchii (December) 3 (TYO): 19 buba Hornbill Benjung tenzüker anogo asemnü amungdang tourists 11497 tashi aru, ta Directorate of Tourism-i metetdaktsü.
Tanü benjungi arurtem rongnung foreign tourists 347, domestic tourists 2482 aser local visitors 8668 liasü ta parnokisa shisem.
Tanü Art & Culture Department-i Kisama nung sobaliba sentong ka ayonga amung aser iba mapang Nagaland nung kin balalai shilem agi.
Tanü agiba sentong nung tongti tesemdangerji Member Secretary, Indira Gandhi National University Centre for Arts (IGNUCA), Dr. Sachindanand Joshi liasü aser Rural Development Advisor Dr. Nicky Kire o F&ES, SIRD, R&R Advisor Phowang Konyak na host liasü.
Hornbill benjung ajanga naga nunger dak sempet aliba sayur aser iba ajanga India sobaliba takar kümdaktsür, ta Dr. Sachindanand-i o jembidang ashi.
IGNUCA ajanga linük nung aser tangalen India nunger arts bendener, wazüka ayur aser ajungketer. Hornbill benjung den sendaktepba atema kanga pelar aser IGNUCA-i Nagaland den tesentaktep yangluba ya takangba akümtsü imlar, ta paisa metetdaktsü.
Tanü Angami teburtemi Phita tsüngsanga sobaliba sentong tenzük aser iba mapang tetsürtemia shilem agi. Phita tsüngsang ya yim o yim akangjungshitepdang Kida Ki Nyi (friendship rituals) tsüngsanger. Ano Sokienyi (harvest festival) nunga teburtemi iba tsüngsang tsüngsanger.
Aortemi Hornbill tsüngsang tsüngsanga sayu. Iba tsüngsang ya hornbill ozü tushia tsüngsanger aser tsüngsang nung ozüi jajaba jilu ayir.
Chakhesang nungertemi Kubo Lichi Kemhou Ketsu (blowing of traditional trumpet) sayu. Alu nung adokba chiyungtsütem achitsü yariogo aser benjung amungtsü mapang tongogo ta sayudang jemji apur.
Chang nungeri Tongten Senbu (pulling of traditional log drum) sayu. Oboula nunger mapang morung nung süngkong ya kanga dang tongtipang shilem ka liasü aser raradang, alima lendong atalokdang aser nisung asüba osang sangoktsüdang süngkong amshi.
Sentong nungsa Garo nungertemi Wangla tsüngsang sayu. Iba tsüngsang ya Wangla benjung mapang tsüngsanger aser iba sülen Khiamniungan nungertemi Ho-E Tsu sobaliba ken aten.
Konyak nungertemi Leaphet (bamboo dance) sayu aser iba ya aou süng amshia tsüngsanger.
Lotha nungertemi EkhyoShari ta ser takok angudang tsüngsangba sayu. Phom nungertemi Naü-ü Asho ken aten.
Maneni, Pochury cultural troupe-i Athso Theserie yar tsüngsang sayu aser Kachari cultural troupe-i Goda Jang Konsa Dobani saisapong asaya sayu.
Rengma cultural troupe-ia Tefü Kethyü Lü ken aten aser Sangtam nungertemi Thsakuk nyinging (butterfly dance) tsüngsang.
Sumi nungertemi aphilo kuwo (war dance), Yimchunger nungertemi Khuyh Achihkhi saisapong, Phanjang Village cultural troupe-i Jangcha Lam dance aser Zeliang cultural troupe-i Herie Lim tsüngsangtem ajanga shilem agi.
Sobaliba sentong atema host temji- Health & Family Welfare Minister S. Pangnyu Phom aser IT, S&T, NRE Advisor Mmhonlumo Kikon na liasü.