Tanü nungi Aowli benjung tenzüker

Mokokchung, Luchii/December 05 (TYO): Watsü Mungdang-i ayongzüka mezüngbuba ‘Aowli Benjungmung’ sentong yangi Imkongmeren Sports Complex Mokokchung nung December 6 nungi 8 tashi akatsü atema luden balala lemsar mazüngi inyaktepdagi, ta osang ka ajanga metetdaktsü.
Iba benjong ya tongtibangsa Aotsür Aor rongsenkettsüng aser loktiliba jenjang ajungketa taküm libaliru renloktsü aser Aor sobaliba, yimsüyimbong aser teka mapa tapu meyina wazüka ayutsü nükla yur ayongzüker.
Iba benjung ya December 6, 2018 nü anepdang 10:00 ako nung taoba Additional Development Commissioner, Wt. Aolemla-i tenzüktsütsü sentong renema lir.
Mezüng anogoji sobaliba sentong agi tua alitsü aser iba den sobaliba saisapong tetoktepba balala akatsü. Nikongdang 5:00 ako nungi tenzüka ‘western & folk fusion’ ta sür kentenmenü sentonga ka ayonga lir.
December 7 nüji anepdang arr atsütepba tetoktepba ka alitsü aser nikongdang Ao ken atenertem ajungkettsütsü asoshi kentenmenü sentong ka akatsü.
December 8-ji Christmas jili amungba benjung ka asütsü aser iba anogo nungji Inter-ward Carol, bonfire, Christmas tree yangluba tetoktepbatem alitsü aser tatem nung Samaro teloki shilem agia iba benjung shibangtsü.
Anogo asemnü benjung nungji; sütakmentak, po yangluba, olaangla mapa, nület tsüngshishi, rubber lijak kashishiba, au jaja, arr atsütepba aser ano tapu aika alitsü.
Iba den ano nüngdakba osettsüset aser chiyungtsü tapu balala ayokdak, asaya tapu balala asayadak, naro sayuba aser ayokba, local designer-temi yangluba süoshi aser sobusolemtsütem ayokba süki (stalls) balala lapoktsü.