Tang mezüng Nagaland Honey Bee Day mongogo

Luchii/December 05, 2018 nü Dimapur nung Nagaland Planning Minister, Neiba Kronu aser Advisor, Mhathung nati Nagaland Honey bee Day 2018 souvenir sayatsüba noksa nung angur. 

Dimapur, Luchii/December 05 (TYO): Tang mezüng Nagaland Honey Bee Day anogomong sentong NBHM Multi utility centre, 6th Mile Dimapur nung tanü ayongzüka mongogo, aser iba sentong nung Ministry Planning & co-ordination, Land Revenue Neiba Khronu tongti Patron liasü, ta ketdangsertem osang ka ajanga metetdaktsü.
Iba sentong nung jembidang pai, shiruru aser süngdonglidong jenti aliba takar state rongnung Nagaland densema lir; tanga state tem nungbo ninang metsütsüji kanga tasak, kechiyong Nagaland nung ama masü saka tanga state nungbo ninang metsüeri bakos tesem melenshitsüsa akumer, ta shia lokti dang ninang metsütsü ajungshi.
Paisa India sorkar dang, Naga nungeri junga inyaktetba mapatem nung temelung agutsütsü mepishi.
“Mapang talangka Nagaland sorkari temelung agutsütsü tim nung melung magütsüi aru, ajisüaka tangbo lenmang yanglutsü aser power adokdaktsütsü merangtsü, kechiyong itemji kanga tongtibang,” ta pai metetdaktsü.
“Tang mezüng Nagaland Honey Bee Day anogomong nung asenoki renemshir tejakleni aotsü aser Nagaland ya ninang mochitsü lima ka kümdaktsütsü atema meranga inyaktsü merangdi,” ta paisa ayongzük.
Iba sentong tenzüka Baptist Revival Church, Kuda, Dimapur Pastor, Khriezovi Kiso-i sarasadema liasü aser Chairman, NBHM, Ntsemo Nyullie-i lokti pelaa agizükba o jembi.
Sentong nungsa Deputy Commissioner Ministry of Horti GOI, Naveen Patel aser Advisor Horticulture aser taoba mapang Team lenir, NBHM, Mhathung Yanthan nati jembia liasü.
Kasa sentong nung mezüngbuba Naga Idol 2006, Moanungsang-i ken ka aten.
Sentong nungsa Chairman VBKC Yakor village, Tuensang, Longkhangba-i takok ngua inyakba otsü lemsatep, Nsong village nungi Zeliangrong cultural teloki bee dance ajanga shilem agi aser Team züngsem, NBHM, Neilazono Terhuja-i sempet lema agutsü.
Item awards rongnung best painting, best photography, Best village beekeeping Community aser district ajak nem best bee keeper award densema lir.
Deputy Secretary aser team lenir NBHM, T Imtiwapang Aier-i tepela anküp o jembia liasü.
Iba sentong ya Moalemla leniba nung agia liasü.