Hornbill International Rock Contest (HIRC) 2018 tenzükogo

Dimapur, Luchii/Dcember 06 (TYO): Kanga dang yongyaa-ataba Hornbill International Rock Contest (HIRC) 2018 sentong Luchii/December 06, 2018 nü Dimapur kübok Agri Expo Site nung tenzüktsüogo. Iba sentong nung India ajunga nungi band 24-i shilem agitsü.
Luchii 5 nungi tenzüka 8 nü tashi agitsü aliba preliminary round nungi band 24 rongnung band 8 shimtsü. Delhi aser West Bengal, Mizoram, Meghalaya, Assam aser Nagaland nungi band 8-i iba tetoktepba sentong lapokja telok jangratemdaktsüogo.
India nung domestic rock fest tulutiba aser senpet sen tulu aketba tetoktepba HIRC sentong ya 2006 küm nungi Hornbill National Rock Contest ta nüngja agütsür tenzüka tang tashi takok tulu ngua arudar.
2013 küm iba sentong nung alima sabang ajak nungi shilem agitettsüsa maongka lapokja liasü. Iba Rock Contest nung takok angurtem nem senpet sen lakh 10, first aser second runners up nung takok angur band nem senpet sen lakh 5 aser lakh 3.5 agütsütsü renema lir. Iba dak alaka, kija nem senpet sen aser sempet agütsütsü.
Iba tetoktepba sentong nung tetendangertemji Derek Julien, Sonam Sherpa aser Among Jamir nunger alitsü.
India indang rock band rongnung tulutiba ‘Waterfront’ nungi guitarist Derek Julien-i osangbener den jembiba mapang pai ashiba agi, iba sentong nung tetokteper tem tendangtsüji mapa tasak ka asütsü akok.
India indang band rongnung Europe lima balala sema ken tena senzübaji Waterfront band ya mezüngbuba asütsü, aser ajia parnoki mejemba original english oshi kentem tena liasü.
Among Jamir, shibai Bollywood music director Pritam den külemi inyaker, pai ashiba agi, mezüng Hornbill National Rock Contest sentong nung par band-i shilem agi aser final tetoktepba tashi tonga shilem agia liasü.
“2006 küm Hornbill National Rock Contest nung shilem agibaji kü atema tajangshiba tuluka liasü, aser taküm küm-a iba sentong nung shilem agirtemi pei dak aketba sempet tajungtiba aser tashi sayutsü imlar,” ta Among Jamir-i ashi.
1991 küm nungi nüngtugu akümba band Parikrama, iba telok lead guitarist, Sonam Sherpha-i ashiba agi, “Iba sentong nung music sayuba aser jenjang kanga dang tema asütsü, aji ni jangjaa lir. Atangji nunga, ozü asem (Derek, Among aser Sonam) atema shilem agirtem tendanga aser takok osang agütsütsüji mapa tasak ka asütsü. India nung, Hornbill tetoktepba sentong ya ajaki jangjaa lir aser iba sentong ajanga band tajungtem aika atsüa arur.”
Taoba mapang Nagaland nung sentong ana agidang, koba ka nungbo guest band ama Hornbill Music festival shilem agiba band Parikrama nungi Sonam-i ashiba agi, “Hornbill Music festival ya music sentong ka dang masü mesüra takok angutsüba dang masü saka North East indang chiyongtsü tajungtiba chia jema, iba tesem indang sobaliba aser music tem ajangshia tepela anguba sentong ka lir.”
LiveNow Events-i achayangba, Hornbill International Music Festival ya iba Hornbill Festival indang sentong shilem ka lir.
Iba sentong ya tenzükli nungi tang tashi India nung iba festival sentong kanga dang nüngtugu kümogo, kong talisa western music nung tetoktepba ajanga tali dang nübur atsüa arudaktsür.
Sangtennü/Tuesday nikongtsütsü, Korean Pop boy band MONT-i Hornbill Music Festival sentong lapokja liasü. MONT-i Korean aser English pop kentem tena telok kanga dang ajungmesodaktsü.
Iba dak alaka, Korean boy band yagi Bollywood ken ana atenba ajanga telok süngmangdakja aser saksalemdakja liasü.