Mokokchung DC-i public dang pelar

Dimapur, September 9 (TYO) : September 8, 2015 nü Mokokchung Deputy Commissioner, Sushil Kumar Patel-i Power Department ketdangsertem aser Mokokchung nung NGOs/Civil Society külem senden ka alitsü ayonga agi aser iba senden nung tang Mokokchung nung power supply timtemba onük benoka lemsatep.
Senden nung Mokokchung DC-i jila aser temeket aliba yimtsüng nungi nübortemi tesüiba anogo 15 tashi timtem arema aruba atema pelaba metetdaktsü.
August 25 nü 33/11 KV 5MVA transformer raksaba atema nemjema bilemer ta Mokokchung DC-i senden nung ashi aser iba transformer ya tekaratiba nung yanglutsü atema mapa inyakdar anungji Mokokchung aser temeket aliba yimtsüngtemi maneni aremzüka atatsü mepishir, ta paisa shisem.
August 25, 2015 nü Mokokchung nung 5MVA transformer raksatsüba sülen department-i jila aser temeket aliba yimtsüngtem nung heavy load shedding alitsüsa aküm, kechiyong power supply agütsütsü atema department ket nung tanga lenmang kecha mali.