Dimapur nung Yimkong lenmang ka lapokogo

Dimapur, Luchii/December 06 (TYO): Ao Kaketshir Telongjem Dimapur Hon Jubilee mung sentong yimya balaka nung amungtsü asoshi Luchii/December 06, 2018 nü taoba Chief Secretary, Govt of Nagaland & CEO Investment & Development Authority Govt of Nagaland, Alemtemshi Jamir, IAS (Retd)-i yimkong lenmang den mural lapoktsüogo.
Süklep 1,000 tetsüng lenmang den külemi iba madak aliba longru jara nung tetezü aketba noksa tapu balala yangluba (mural) ya Golden Jubilee benjongmung nüngtem nung yanglu, aser iba ya northeast India nung mural talangtiba asütsü. Iba mural painting ya Ao Kaketshir TelongjemDimapur-i apiteta yanglu aser parnokisa anepalutsü.
Iba mapa tajung atema Alemtemshi-i Ao Kaketshir Telongjem Dimapur nem tenüngsang agütsü, iba den külemi Naga nunger atema iba ya mera tasen ka lir, ta pai ashi. Asalentong aser tebilemba shisatsü tasen ajanga lokti nung temelenshi tulu bener arutsütsü akok, ta shia pai Mural aser sidewalk ya mapang shia anepalutsü asoshi Ao kaketshir dang mepishia liasü.
Dimapur Municipal Council CEO, Moa Sangtam-i ashiba agi, tanga kin den medemdangra, Ao kin-i lokti atema shilem tajung agia mapa tajung inyaktsüba ya ajak atema tajangzük lir. Tarutsü anogotem nung Dimapur jila kübok project ana – Drinking water aser clock tower – lapoktsü, ta paisa metetdaktsü.
Moa-isa, northeast India nung iba mural painting ya talangtiba lir aser Dimapur nung iba maparen tenzükba ya jangratemtsüka lir, ta metetdaktsü.
Sentong nung Ao Kaketshir Telongjem Dimapur, Golden Jubilee planning committee convenor, K Temjen Jamir-i iba maparen takok ngua achaayanga inyaktetba asoshi DMC CEO, Moa Sangtam nem tenüngsang agüja liasü.
Yimkong lenmang ya nübur ajak ajangzüktsü nükjidong nung AKTD aser DMC longjemer yanglu.