Hornbill Festival anogo trok buba nü Akikiti asaya kaogo

Kohima, Luchii/December 06 (TYO): Kisama nung tang tagidak aliba 19buba Hornbill Festival sentong anogo trokbuba Luchii/Dec. 6, 2018 nü Kisama Amphi theatre nung Sumi nunger kick fight (tetsüng agi metsütepba) ‘Akikiti’ asaya ka asayaa liasü.
Akikiti ya martial art asaya tapu ka lir, kong raratsü atema tetsüng aser temopu dang amshia asayar aser nokdanger. Mezüngbo mesüra akhi tetsü tebu mapang iba asaya ya teburtem atema asayamenü ka ama aser telok ana mesüra kija tsüngda mangatettep ken o adokba mapang bentettsü atema Akikiti asaya ya amshia liasü, saka tanübo iba ya saisapong ka ama asayar.
Akikiti ajungkettsütsü aser asentenshidaktsütsü nükjidong nung, iba asaya ya Pughoboto nung küm shii Yimpoksüi/November ita Thuwuni festival (Indigenous games & sports Olympic) amungba mapang asayar.
Iba asaya ya nisung ana tsüngda abilen tetsüng agi jokshishia achichi agi metsütepa asayar. Asaya nung teka medeni dang asayar aser teka sangshira asayarji aibelener ama o bendang agütsür. Round shia minute 3 nugi 4 tashi asayar. Metsütepa asayba mapang tetokteper ana rongnung shibai tama pa den tokteper laodaktsüdir pai takok angur.
Aphuyemi Akikiti Association ya ‘Imheh no ikumto’ (my culture my strength) omen nung ajemdaker Ronchii 22, 2014 nü tentetta liasü. 1922 küm J.H. Hutton-i züluba ‘The Sumi Naga’ kaket nunga Akikiti asaya otsü zülusema lir.