Arangshitsü mapang

Taküm Dimapur nung Ao Kaketshirtem Telongjem hon jubileemong ‘Arangshidi’ ta asüba omen nung ajemdaker mongogo. Arangshidi ta asüba tetezüji asenok nok mechira kümogo ta angatetter. Atangji, mapa inyaktsü malinungbo marangshiyonga kecha masü, saka arangshitsü nüngdaka akümbaji mapa tulu inyaktsü anendaka lir ta sayur. Ibai Dimapur nung alir Aor kaketshirtem asoshi dang masü saka asenok Aor ajak asoshi arangshitsü nüngdakba tayongzükba ka asütsü. Atangji, asenok arangshitsü nüngdaka mechirai akümba nok aika lir. Item rongnung kaketshisatsü bushiba nung asen nok mechirai akümba, Tsüngrem mapa inyakba nung asenok tanüla nok mechirai akümba aser tangar asoshi aria bilema temeim mapa inyakba nok mechirai akümbatem asütsü. Asenoksa tia tajungba, asen dangi Tsüngrem temeim osang tajung den külemi kaketshisatsü angazüka zülutsü aser azüngtsü asoshi maongka aru. Ibaji tangar ket nung nok maka aser memetet dang asenok nem tama Tsüngremi Pa tenyartem ajanga mapa inyaktsü asoshi nok techira amuoktsüba liasü. Iba nokji amshia asenok tanüla tekümtet angu aser shi nunga tashitemetet aküm. Iba temoatsü nung asenok tsüraburtemi inyakba mapa tajung kaji asenok nem agütsüba nok agi asen kija agitsü inyak masü saka nok makaba Naga kintem asoshi asenoki lenmang aika lapokja yariogo. Tanü asenok jangratema alirtem ya item nok amshia tangar tajung kümdaktsür chirnurtem lir. Asenok tsüraburtemi memetetba purtem meteta kümdaktsüba aser parnok dang temeim mapa inyakba temoatsü manung tanü asenok jangratema alir. Tetezü, tanü asenok jangratema aliba ya asenoki tajung inyakba agi masü saka tsüraburtemi tangar asoshi tajung inyakba agi Tsüngremi asenok moatsür. Akümli nung tajung süli, tamajung süli ajakji senmang lir. Aji meteta asenoki asen chirnurtem junga lidaktsünüra asenokia asenok tsüraburtemi tajung inyakba amaji tangar asoshi tajung inyaktsüla. Tanü asenok kija aser lokti taküm ya reprangdangra nok mechira aküm ama mesüra gari nung totzü tsüktem ama tejakleni onüyonga moutet aser mapa tajung inyaknüyonga meinyaktet kümogo. Ibaji asenoki shitakba shisatsü masü saka degree aser certificate bushiba agi aser shitakba tanüla nung tangar asoshi aria bilema masü mesüra tangar yarinüba agi masü saka ita sen angutsü asoshi tenzükba agi asütsü. Asenok tsüraburtemibo tangar tajung kümdaktsünüba agi school-a talangka mazüng tesayur mapa inyak aser tetsüng agi jajaa Tsümgrem temeim angatetdakja temulung meyipdaktsü. Yimten mapa nung süli, Tsüngrem mapa nung süli ita sen atema masü saka nübortem nüchi kümdaktsütsü asoshi inyak. Ibayongji, ita sen dak tali Tsüngremi moatsü. Tanü item chirnurtemji asenok lir saka asenokibo asen ajungtsü bilemba dak alaka tangar tajung kümdaktsütsü asoshi bilema meinyaker. Asenok aika mapai mao ita sen agir aser mapa meinyak sen agizüka agir. Tangar atema temeim mapa tajung inyaktsütsübajibo yutsür timtemer aser makamaitertem indang dena agizüka chitsür. Asenoki timtemer aser memetetba lima tonga oagi parnokjibo metenzükner saka parnok tenüng nung mapabo inyakner aser tajangzükbo aginür. Iba amaji asenoki asen kija ajungtsü aser akatsü bilema inyakba agi asenok nok kecha mechira kümogo. Iba jagi kaketshisatsü bushiba nunga, yimten yimsüsüba nunga aser tanüla tsütsüa tangar nok techiraba kümogo. Iba ama tia ka nung asenoki asenoksasa asen nok arangshitsü bilemtetbaji Tsüngrem taochi ka arur asütsü. Asenokbo joko shitakba shisatsü bushia tangar asoshi tajung inyaktsü arangshidi. Kodang asenoki tangar asoshi tajung inyakdir Tsüngremi asenok asoshi tajung inyaktsür. Joko, tsüraburtemi tajung inyakba agi asenok moatsüba temoatsütembo agimadagi. Iba tia ya reprangteta tanüsa asenoki Tsüngrem bushia ochi aser tajung meinyakra temoatsü ajak asen taküm lia agimatsü. Iba temoatsüji magimadang, asenoki tajung, ochi aser temeim mapatem inyakloktsüla.