Naga Raja mersü chitepba tetoktepba nung Akho-i takok angu

Kohima, Luchii/December 07 (TYO): December 07, 2018 nü Naga Heritage Village, Kisama nung Naga nunger Raja mersü chitepba tetoktepba nung Phek District nungi Akho-i takok nguogo, ta tanü ketdangsertem osang ka ajanga metetdaktsü.
Naga King Chilli Eating Competition ya kümshia Hornbill festival nung ayongzüka agia arudar. Kümshia nisung noklang aikati iba tetoktepba ya kanga sapua reprangteper. Bendang linük balala nung Naga Raja mersü nüngtugu kümdaktsütsü nükjidong nung iba tetoktepba ya kümshia Hornbill festival nung ayongzüka agir.
Iba sentong ya XL Nagaland-i achaayanger aser Horticulture department-i sponsor asüba den Oking Hospital & Research Centre, Kohima-i nungiter.
Iba tetoktepba nung takok angusang, Akho-i Naga raja mesü pongu tashi chia local category nung takok angu. Tanabuba jenjang nung takok angusangji Peren district nungi Seintong liasü aser tasembuba jenjang nung taklok angurji Kohima nungi Aku Khamo liasü. 1st, 2nd & 3rd jenjang nung takok angur nem senpet 20,000, 15,000/- aser 10,000/- agutsü.
Ano Peren nungi Seiminlal-i pezübuba jenjang nung aser Kohima nungi Keneiselhou Viyie-i pongububa jenjang nung takok angu; tenaprong nem senpet 5,000/- agutsü.
Ano kasa tetoktepba- tourist category nung Guwahati (Assam) nungi Tapan-i Naga raja mersü trok tashi chiteta takok angu. Iba dak alia 19buba Hornbill Naga King Chilli Eating Competition nung tematiba jenjang nung takok angurji pasa lir.
Local category nung shilem agia tokteper parnok ti liasü aser tourist category nung tetsür ka densema shilem agir parnok pezü liasü.
Iba tetoktepba nung takok angurtem nem Secretary, Tourism, T. Mhabemo Yanthan-i sempet lema agutsü.