Hornbill benjungmong anogo 10nübuba nung sobaliba sentong balala agiogo

Luchii/Dec. 10, 2018 nü Kisama nung Kisama nung Chakhesang nunger tebur chanutemi “Uwhe” (tongbang washiba) shilem agiba noksa nung angur.

Kohima, Luchii/December 10 (TYO): Tanü Kisama nung Hornbill Benjungmong tatembangbuba anogo nung sobaliba sentong ‘Cultural Connect’ Department of Art & Culture-i ayongzüka agi, aser iba sentong nung tetushi tejaokerji Higher & Technical Education Minister, Temjen Imna Along liasü, ta ketdangsertem osang ka ajanga metetdaktsü.
Tanü Nagaland tesem balala nungi sobaliba telok 17-i sobaliba ken, yar tsüngsang aser sobaliba shilem balala ajanga tesemdangertem jangratemdaktsüogo.
Tanü ‘Cultural Connect’ sentong nung Angami nungeri sobaliba tsüngsang ‘Phita’ ajanga shilem agi. Iba ya sarir tsüngsang ka lir aser teburtemi dang tsüngsanger, ajisüaka putu mapang melenshia tetsürtemia tebur den külemi shilem agi.
Khiamniungan nungeri Liam Keh (yimjung tezngzüktep) shilem agi. Liamkeh mapang nung parnoki ken tena tsüngsanger aser yimjung tezüngzüktep agiba temaitsü nok aser sü melentepa kati ka atema sarasademtsür.
Zeliang nungeri tatembang salem tsüngsang ‘Ka-ke-nui-be’ ajanga shilem agi. Iba tsüngsang ajanga benjung ka mesüra sentong ka tembangba temaitsü sayur.
Kachari nungeri tatembang tsüngsang ‘Bikhao Ba’ ajanga shilem agi, iba tsüngsang ya Dimasa nungeri aluruwa tembangba, Hangsaw Bishu tatembangbuba anogo nung ajaki tsüngsanger.
Yimchunger teloki ‘Thuneo Khun’ ajanga shilem agi, aser iba ya Medum Neo aser Thsungkam Neo benjungtem nung atenba ken lir.
Pochury nungeri ‘Ho! Nonari Lonari’ ken aten; iba ken ajanga medemer aser kinünger dak melung atokba aser meimba indang lemsateper. Iba ken ya tongtibang benjungtem nung tsüngsanga atener.
Sumi nungeri arr atsütepba ‘Ikha sunhei ikha tashe’ shilem agi, aser iba asaya nung tajemba agi nisung 31-i shilem agi. Iba asaya nungbo lisü menüngdanger, ajisüaka telok ka nung züngsemtemi kati ka dak teboklang nungamer tanga telokji atsüer, aser iba mapang nung ali nung malangba telok jagi takok angur.
Lotha nungeri takok anguba tsüngsang ‘Ekhyo Shari’ ajanga shilem agi; iba tsüngsang ya kidanger yimtem maaka takok anguba sülen tsüngsanger.
Chang nungeri shisa taka tetsürtem nem tenüngsang agüja atenba ken ‘Sangbu Dobu Yakie Lao Hangentibu Chai’ ajanga shilem agi. Iba ken ya shisa taka tetsür kati kinüngbur ka lokti nung lenir kümdaktsüba nung yariba atema tetushi agüja atenba ken lir.
Nikongdang sentong nung Deputy Chief Minister, Y. Patton tetushi tejaoker ama host liasü aser iba sentong nung Sangtem nungeri sobaliba tsüngsang “Khava Jing Tsu Tsoh” ajanga shilem agi. Iba tsüngsang ya Sangtam nungeri waro jokshishiba nungi angazükba tsüngsang ka lir.
Konyak nungeri “Lulu Yeinu & Oyuh Meilo” tsüngsang ajanga shilem agi; iba tsüngsang ya Konyak nungeri aou agi yangluba ‘Zangvun’ longa tsüngsanga Tsüngrem temoatsütem temaitsü sayuba tsüngsang ka lir. Benjung tembangba mapang nunga parnoki Zangvun longbanger tepila ken atener.
Phom nungeri “Pangh Ow” (Ariju tebor ajungba) ken aten aser Kuki nungeri arem shiruru tamajung shikariba nung takok anguba pela agizükba “Savai Lhun” shilem agi.
Aortemi Naklu tsüngsang ajanga shilem agi; iba tsüngsang ya kika süchir aser parnok kibong nem tsüngremi moatsüba atema parnok nem akhüm aguja tsüngsangba ka lir.
Rengma nungeri “Ngada” tsüngsang ajanga shilem agi; iba mapang nung takar aser sensakertemi chiyungtsü lemsatepa achir.
Chakhesang nungeri tongbang washiba “Uwhe” ajanga shilem agi. Tebur ka tanur asüdangyongi tongbang raratsü/mangko bushitsü atema tesayuba agutsür, aser ibaji Kuzhanokhru bendentsü (Kuzhanokhru nungi jakzükertem nem saru agutsütsü atema) aser tebur chanutem dang tongbang washiba tasa sayur. Garo nungeri “Wangala” tsüngsang ajanga shilem agi; iba tsüngsang ya aluruwa sülen tenüngsang agutsüba benjung Wangala den sendaktepa lir.