RBI Governor Urjit Patel mapa nungi anen

New Delhi, Luchii (December) 10 (Agencies): Urjit Patel-i Hombarnü Reserve Bank of India (RBI) Governor mapa nungi anenogo.
Pa ya 24 buba RBI governor liasü aser September 26, 2016 nü küm asem kümsük inyaktsü atema shimba liasü.
“Nija khuret kar ajanga ni tanü nungi iba menden toktsütsü telemtetba agiogo” ta Patel-i sangdong ka nung metetdaktsü.
“Tanü ajungbena RBI governor menden yutsüba Urjit Patel-i linük nung banking system jenjang tamajung aliba nungi anitet. Pa lenisüba kübok RBI-i senotsü jenjang tajungba kümdaktsü,” ta Prime Minister Narendra Modi-i Twitter nung metetdaktsü.
“Dr Urjit Patel ya tashishitsü maliba mongin nisung ka lir. Pai Reserve Bank of India (RBI) nung Deputy Governor aser Governor ama küm trok shi inyaka arur toktsür. Pai tenüng tajung yutsür aoer. Asenoki pa kanga menungratsü” ta Modi-isa ashi.
Finance Minister Arun Jaitley-ia Patel mapa toktsüba atema aoksaba metetdaktsü. “Dr Urjit Patel-i RBI nung Governor aser Deputy Governor ama inyakdang linük asoshi mapa tajung inyaktsüba atema sorkari kanga pelar. Pa den külemi inyaksemba atema kanga pelar aser pa nungi tajangzük aika nguogo” ta pai ashi.
Centre sorkar aser RBI tsüngda hopta aika RBI indang tashi atema toktepyonga arur. Prime Minister Narendra Modi-i aniba sorkari RBI indang surplus reserves nung teka aitsü atema sen aputsüba maparen nung talenbatem salatsü meranger.
Taoba RBI governor Raghuram Rajan-ia ashiba agi, “Dr Patel-i sangdong ka agütsüogo. Iba ya regulator mesüra civil servant kati inyakba mapa ka lir. Pai ashibaji akhümtsübutsüla. Kechiba pai iba menden toktsütsü telemtetba agi ta asüba kuli asenoki mebushitsüla. India nunger ajaki iba tebilemtsü atema süoki ia bilemtsüla kechiyong iba reju indang tashi ya kanga tongtipang lir.”
Taoba Finance Minister Yashwant Sinha-ia ashiba agi, tesüiba mapang ama tensa kanga mejungi lir aser Patel-i mapa nungi anenba ajanga temelenshi kecha mali ta asüba sayur.
“Urjit Patel-i mapa toktsüba ajanga kecha memelenshi ta asüba sayur. Taoba mapang ama tang-a kasa dang lir. Pai mapa toktsüba ajanga sorkari RBI maparen nung teka amouktsü merangba sayur” ta Yashwant Sinha-isa shisem.
Külen, Congress President Rahul Gandhi-i ashiba agi, Patel-i RBI kümzüka ayutsü mechi nung mapa nungi anentsü asütsü akok.
“Nisung kar kümzüktsü atema RBI nungi reserves agienbaji linük anema inyakba mapa ka lir. Nisungtem aser reju balalai iba inyakyim anema noktakba angudang ni kanga pelar” ta Rahul-isa ashi.
Urjit Patel anenba atema Kapil Sibal-i PM Modi aitsü. “Modi-i shimba nisungtemi mapa nungi anener. Mezüng Arvind Subramanian-i CEA toktsü aser tang Urjit Patel” ta Sibal-i ashi.
“Rongsenkettsüng tia kanga mejungi lir. Modi-i pa economist tulutiba ta bilemer aser iba jagi pai economist shinga nüngdak mali, iba jagi parnoki mapa toktsür” ta Sibal-isa shisem.