19 buba Hornbill Festival tembangogo

Dimapur, Luchii (December) 10 (TYO): 19 buba Hornbill festival, Kisama tembangba sentong nung Italian Consul General, Kolkata, Damiano Francovigh-i tongti tesemdanger ama shilem agi.
Iba sentong nung host ji Deputy Chief Minister Y. Patton aser Tourism & Art and Culture, Advisor, H. Khehovi Yepthomi na liasü.
“Putu aika Nagaland indang sobaliba takar ya alima dang mimbanga ayu saka iba benjung ya alimai Nagaland metettsü atema kichiba ka ama lir,” ta Y. Patton-i ashi.
Anogo 10 tashi benjung amungdang tourist anema mapa inyakba osang kecha maliasü aser iba atema kanga pelar. Maneni, 19 buba Hornbill festival takok ngudaktsüba atema tayongertem, shilem agirtem, domestic & international tourists aser sendaktepa alir ajak dang kanga pelar, ta paisa metetdaktsü.
Tongti tesemdanger Damiano Francovigh-i o jembidang, pa iba benjung nung adentsü jaokba atema pelaba metetdaktsü.
Tarutsü anogotem iba benjung takok tuluba ngua amungtsü imlar aser Naga rongsenkettsüng inlokba nung tongti shilem ka asütsü imlar, ta Damiano-isa ashi.
Sentong nung Advisor, Khehovi-i anküp tepela o jembi aser Faith Harvest church Pastor Rev. Shan Kikon-i tenüngsang agüja sarasadem.
Kisama nung 19 buba Hornbill festival indang bonfire ji Damiano Francovigh, Y. Patton, Khehovi Yepthomi, Miss Nagaland 2018 Mewetshou Dianu aser Miss World Asia 2014 Koyal Rana nungertem tsüklok.