Arunachal Naga purtemi akangba ataloktsütsü : Rijiju

New Delhi, Sept.09 : Arunachal Pradesh state kübok alir Naga nungertemi anogo ana agia Minister of State, Home Affairs, Kiren Rijiju aser Naga peace interlocutor RN Ravi na ajurua parnok yimten nüngdak jembiba mapang tenapronglai parnoki aginübaji ataloktsütsü ta metetdaktsüogo.
Arunachal Pradesh nung Naga nunger aliba district-temji Tirap, Changlang aser Longding lir.
Item Naga nunger alidak tesemtenji renloka aotsü atema parnoki aginüba ama parnok nem Patkai Autonomous Council agütsütsü ta centre nung lenirtemi nangzükogo ta angazüker.
Arunachal Naga purtemji Patkai Autonomous Council Demand Committee nung mendenbuba N. Changmi-i anir liasü. Central lenirtem den ajurua jembiba sülen, pai ashiba agi centre sorkari parnok akangba ama Patkai autonomous council akümtsü agizükogo aser ibaji mapa küma aotsüba sentongtem yakta tenzüka aotsü.
” Kechisüdirsüaka onoki Patkai Autonomous Council kümner. Mapang talangka onok alidak tesemtem nung terenlok mapa meinyaker, anungji district asem ya autonomous aküm nung dang tangar den kasasa terenlok mapa inyaktettsü. Tang tashi nung yimten teloktem liaka, parnoki terenlok mapa inyaktsü asoshibo mebilemer,” ta Patkai Autonomous Council asoshi inyaker züngsem, Nokchai Boham-i metetdaktsü.
” Arunachal nung district asem nung terenlok mapa inyaktsü asoshi bilemba sentongtema sorkari sadema mejembitetter, kechiyong itemji yimten teloktemi menentsütsü aser timtemang adoktsü tsübur,” ta Bohamisa ashi.
Arunachal Pradesh nungi Tirap, Changlang aser Longding nung Naga nunger lenirtemi center nung lenirtem ajurua parnok tebilemba süoka jembibaji tang ya mezüng asütsü. Kasa nüngdak ken o Chief Minister Nabam Tuki-ia home minister den jembia liasü.
Tamalen All Arunachal Pradesh Students’ Union (AAPSU) lenirtemi R.N. Ravi ajurua Naga yimten tebilemtsü tatem küma latetba mapang Arunachal state lushi nung mekongshitsüla ta nenshia metetdakja liasü.
Naga nunger lushi ya tang India kübok aliba state Nagaland, Manipur, Arunachal Pradesh, Assam aser Myanmar nung lir.
AAPSU lenirtemi R.N.Ravi ajurua jembiba indang koma bilemer ta asüngdang dang, “Tirap, Changlang aser Longding district-tem nung Naga nungertem lir, anungji parnok nüngdaktem indang Naga nunger masüba purtemi mangatettsü aser yimten tsütsü tajangzük agitsü atema tebenjaang benjatsütsü,” ta Bohamisa metetdaktsü.
Kasa onük nung Rijiju-i ashiba agi, ” sorkari Tirap, Changlang aser Longding district-tem nung terenlok mapa inyaktsü nüngdakbatem meteta lir, anungji akok tashi itemji inyak tenzüktsü.”
Item district asemji alinükbo takar lir saka loktiliba aser rongsen jenjang kanga teküpbok tia nung lir. Item tesemtem nungji telong nung alir telok balala tesep tenteta lir. Iba jagi state sorkar danga mashi center sorkar mulungka nung Armed Forces Special Powers Act ozüng agüja lir.