Iba mulungsentsü ne dak liang

Khrista Yisu dak koba temulung liasü, aji nenok daka liang.  – Fil. 2:5.
Yimya-liroji odangbo mataloker: asenoki shimer. Pauli tamangertem dak Yisu temulungsentsü alitsü ajungshi. Yisuji Tsüngrem Chir liasü. Pa menden Tebu tajichilen liasü. Alima ajunga nung yimsü asü. Kotaker Tebu tajichilen amenba dang temaba, tuluba menden mali. Yisu Tebu den tesendaktep aliba ajanga iba menden Pa nem agütsü.
Yisui iba menden meshiim. Kotak nung Pa mendena Pai soeta ayutsü ta Pai kecha bilema mali asü. Tebui Pa menden tokjang ta ashiyonga Pai Pa temeden nung noktaktsü ta Pai kecha mebilem. Pai tebu meim anungji tia ajak nung Tebu dang tashi angatsü aser bendanga agütsütsü mulungtet. Kodang Tebui meimchir alangzüktsü asoshi tarak maket tenla ka aginü, Yisui anemer telok ta atema Pai metenlatsü ta mashi (Isa. 53:7). Iba melen Pai kotak menden toktsür nisung aküm.
Pa nashi ki ka nung aso, chiyongba süng sou nung mejang. Pa koba anogo nung tim atemtsü iba anogo asoshi Pa taküm renema liasü. Item ajak ya Pai mulunga inyak.
Asenoki Tsüngremi asenok nem agütsüba nung akanga soettsü atidaker. Asenoki ashir, “Tsüngremi kü dang asüngdangba ni mulungsoa agütsütsü saka ajak tokjang ta mashitsü ta bilemer!” Tebui Techir dang bendanga agütsütsü asüngdang. Pai asenok dang jangratema aser tepela tokjang ta Pai masüngdangtsü ta bilemer asü?
Ne taküm Tsüngremi Pai mulungba den putepa alitsü asüngdang, nai nungdanga lira, Yisui sayuba mulungsentsü ne daka alitsü Tanela Temeshi dang yaritsü asüngdangang.