KABA pastor-i Tebur Ola kensep ka sayatsüogo

Dimapur, Luchii/Dec. 11 (TYO): Ken kaket tasenba nung nüburtemi memetetba ken aika aliba ajiteta, itemji amangbapurtemi tentettsüla ta tangatetba nung, Tebur Ola kensep tasen ka Luchii/December 08 nü Kohima Ao Baptist Arogo Senior Pastor Rev. M. Asangba Longkumer ajanga sarasadema sayatsüogo.
Kanga dang mazüngi aliba takümtem süaka, pei sempet yari item ken tentsüogo, yamaji nüburtemi sapua item ken tasentem shizüka tenshitsü ta amanger, ta iba kensep yanglurtemi sangdong ka nung ashi.
Tebur Ola kensep sayaba sentong nung jembiba mapang, Rev. Asangba Longkumeri kensep adoktetba asoshi pelaba lemsatep aser iba ajanga tangashir ajak moatsüba den Arogo aika nem tajangzük bener arutsütsü, ta pai lemsatep.
Iba kensep nung kentener temji, L.Chuba Pongen, Supong Pongen, Olem Lemtor, Atu Molier, Yapang jamir, Moa Imsong, Imtisüngkum, Bendangtoshi, L. Ayim Jamir aser Among Imsong nungertem lir.
Iba kensep adoktettsüsa Mr. Yapang Jamir aser L. Chuba Pongen nati senotsü teyari agüja iba Osang Tajung ken ya adokdaktsüogo, ta parnokisa ashi.
Tsüngremi kentenertem, lenmang balala nung yaritepertem, aser iba ken tangashir ajak moajangma, ta kentenertemisa ashi. Kari danga iba kensep ya aginüa lira, iba Mobile number nung tongteprateptsü akok. 9436275111/9436801120.