Assembly elections osang ya BJP-i asadangtsüla: Shiv Sena

New Delhi, Luchii/December 11 (Agencies): Mongolbarnü tawa state pongu nung agiba assembly elections vote tezüngdak nung Shiv Sena-i, state pongu nung assembly election osang ya ajanga BJP nem osang tejangja ka agutsür, aser teloktep sorkari meyipa reprangshitsü nüngdaker, ta ashi.
Shiv Sena otongdar aser Rajya Sabha MP, Sanjay Raut-i, election osang ajanga BJP-i takok nguyonga aruba talongtsü anenba sayur, ta ashi.
Tanü Parliament kima osangbenertem den jembidang Raut-i, “Iba osang ya tejangja, aser asenoki meyipa reprangshitsü atema mapang tongogo,” ta ashi.
Centre aser Maharashtra naprong nung BJP den teloktep liaka Shiv Sena-i mapang shia BJP anema jembir.
2014 küm Maharashtra assembly election nung BJP aser Shiv Sena nati balala toktepa liasü ajisüaka election sülen lokteper sorkar akum.
Congress-i Rajasthan aser Chhattisgarh states assembly election nung takok nguogo. Telangana nung TRS-i takok angu aser Mizoram nung MNF-i Congress sorkar atsüngdoka takok nugogo.
Election osang nung ajemdaker Aam Aadmi Party (AAP) tongti aser Delhi Chief Minister, Arvind Kejriwal-ia, Ato kilonser, Narendra Modi-i aniba sorkar chireptsü atema anogo züngdangba mapang tongogo, ta ashi.