NBSE-i ‘Eat Right Creativity Challenge’ atema sangdonger

Kohima, Luchii/December 11 (TYO): Mahatma Gandhi sor küm 150 ajungba benjungmong dak sendakba nung Food Safety And Standards Authority of India (FSSAI), Ministry of Health and Family Welfare, Government of India-i November 14 nungi December 31, 2018 tashi ‘Eat Right Creativity Challenge’ tenzükogo, aser iba ya sempet aliba tanurtem jungkai adoktsü aser chiyungtsü dak sendakba nung Gandhi tangatetbatem benshia tanurtemi chiyungtsü chiajemba yimya tajung sübatsü nükjidong nung lir, ta NBSE ketdangsertemi osang ka ajanga metetdaktsü.
Iba tetoktepba nung takokertem (yimti aser national level nung) nem sangküm January 27 nü grand finale benjungmong nung sempet agutsütsü.
Iba dak sendakba nung sentong timba agia kuli sayuba school nem Ministry of Health & Family Welfare, Government of India kübok FSSAI-i sempet agutsütsü.
Iba tetoktepba atema osangtsüsang ajak website nung lir aser school temi Eat Right Creativity Challenge atema https://fssai.gov.in/CreativityChallenge/ nung register asutsü akok.
Metetpelanüra schools-i Namrata Khanna (Email: snfatschool@fssai.gov.in/ creativity.challenge@fssai.gov.in) nung mesüra phone no. 09810833743 ajanga tongteprateptsü akok.
Tanurtem chiyungba yimya tajung sübatsü atema school ajak dang iba tetoktepba nung shilem agitsü mepishir, ta parnokisa metetdaktsü.