MLA Moatoshi-i Working Woman project tenzüktsüogo

Dimapur, Luchii/December 12 (TYO): Tanü SMC college auditorium, Dimapur nung tang mezüngsüa Dimapur-II MLA, Moatoshi Longkumer-i “The Working Woman project” scheme tenzüktsüogo, aser Dimapur-II A/C nungi Self Help Groups (SHGs) 226 nem Grant in Aid agutsüogo, ta ketdangsertem osang ka ajanga metetdaktsü.
Iba project ya MLA Moatoshi-i Local Area Development Fund (LADF) 2018-19 kübok achaayanga inyaka SHGs 226 shia nem sen 20,000 agutsüogo.
Iba sentong nung jembidang Moatoshi-i, “Kibong achaayangtsü atema tetsür aikati timtem ajangshir; Naga tsürtemi tanur reprangba dang masü saka shishilembaba maparen angazüka sen aazüktsü atema mapang tongogo,” ta metetdaktsü.
Paisa, “Northeast India nung Mizoram ya tebor tajung state tem rongnung ka lir, aser iba state nung tetsür entrepreneur temi shishilembaba mapa kanga junga inyaker,” ta ashi.
Iba dak sendakba nung pai, “Naga tsürtemia Mizo tsürtemi inyakba amaji inyaktettsü. Asenoki parnok den tajungba inyakteta alima dang kuli sayutsüsa asenok dak tashi lir,” ta ashi.
Shin o “Tzüjang kati molutzü akumer” nung ajemdaker pai, iba senotsü ya ishika dang asütsüa akok, ajisüaka ibaji libaliro ajungkettsü aser rongsenkettsüng renloktsü atema lir, ta shia pai iba senotsü kanga shisa kaa amshitsü ayongzük.
MLA-isa, SHG temi tejang tangdakja inyaktetra tarutsü nungbo senotsü tali lemzüktsütsü, ta nangzük.
“Dimapur ya Nagaland kikümbang ama züngshir, aser iba yimti ya ochimeshitiba yimti rongnung ka lir. Temelenshi adokdaktsütsüji ajak teinyaktsü khuret, anungji iba yimti yangertsü atema ajaki inyaktsüla,” ta pai mepishia metetdaktsü.
MLA-isa, sangküm nungi pai Dimapur nung lenmang tiplen süngdong atemba maparen tenzüktsü, ta metetdaktsü.
Iba scheme metetdakja, Akala Jamir-i, tang iba project ajanga Dimapur II A/C kübok kiyong 39 ayimjemer, aser tarutsü nung tanga kiyongtem nung SHGs tema ayimjemtsü, ta metetdaktsü.
Laisa MLA-i senotsü anepaluba aser department balala den ayongteper SHGs atema training ayongzüka katsüba atema pa dang pelaba lemsatepa liasü.
Kasa sentong nung Naga Women Hoho President, Dimapur, Sungasabeni Lotha, Dimapur Watsü Telongjem President, Yarsangla aser Naga Women Hoho nungi Vimeno Angami nungeria tayongzükba o jembia liasü. Iba sentong tenzüka Indisen Baptist Arogo Pastor, Rev. Dr. Temjen Ozukum-i sarasadema liasü.