NSCN(IM) vice-chairman Khole Konyak asü

Dimapur, Luchii (December) 12 (TYO): NSCN-IM nung Vice-Chairman Gen (retd) Khole Konyak tanü Delhi nung akümli toktsür ogo.
Pa temang mejungi kümer yashi nungi life support nung anepalua aru ta osang angazüker.
Gen (Retd) Khole Konyak-i May 19, 2016 nü NSCN (IM) nung vice-chairman inyaktsü atema tezüngzüktep agi. Iba ya masüdang pa NSCN (Unification) nung President liasü.
Forum for Naga Reconciliation (FNR)-ia Gen (Retd) Kholi Konyak asüba atema mangyimba metetdaktsü.
Naga nüjiso atema rarartem rongnung pa ya tongti ka liasü. Pa tanur asüdang nungi Naga linük atema bendanga agüja inyak. Küm 70 dak tema pai Naga lima atema inyaka aru. Pa asenok den meliaka, pa tanüla teti asenok den alitsü, ta FNR-i sangdong ka nung ashi.
Gen (Retd) Kohli Konyak-i Naga nunger puteptsüba aser longjemtsü atema jembi aser noktak. Pa tanüla teti atema anisüngzük ngudakjang ta sarasademtsür aser pai toktsür aoba kibong aser kinungertem aser sorkar asoshia sarasademtsür, ta parnokisa metetdaktsü.
T.R Zeliang-ia sangdong ka nung, “Ni aser ozüng kibongi New Delhi nung akümli toktsür aoba Gen (Retd) Khole Konyak’er kinungertem den asükhu lemsateper” ta ashi.
Naga National Worker ka ama asür Khole Konyak ya Naga nunger lennir tongti ka liasü aser pai mapa aika inyaka aru. Pai Naga nunger asoshi bendanga agüja inyakba aser Indo-Naga yimjung olemtep posema nungitba ya Naga nungeri teti bilemtettsü, ta paisa ashi.
Pai iba akümli toktsür aobaji Naga nunger atema takoksa tulu lir aser iba ongdang menembangtettsü Tsüngremi par kibong aser kinungertem sünepjang aser pa tanüla teti anisüngzük ngudakjangma ta sarasademtsür, ta T.R Zeliang-i metetdaktsü.
Maneni, NDPP President Chingwang Konyak-ia sangdong ka nung, “NSCN (IM) Vice Chairman Gen. (Rtd.) Kholi Konyak asüba osang angashia NDPP temulung raksar,” ta ashi.
Asür Gen. (Rtd.) Kholi Konyak-i 1950’s tetenzüklen Naga nüjiso bushiba mapa nung ajemok aser pa taküm piyong Naga linük tenzüktsü asoshi bendanga agütsü. Tanü Naga nungertemi jabaso tajung ka samaba atema mang ayimer. Ni anir Nationalist Democratic Progressive Party (NDPP) züngsem ajaki tasür kibong den asükhu lemsateper, ta Chingwang Konyak-isa metetdaktsü.