Tesüma atar asü ?

Yimten nüchiso asoshi alima nung tang tashi raraa aruba raratem rongnung Naga yimten nüchiso asoshi raraba rara ya talangba asütsü südi. Naga yimten nüchiso onük ya Naga Club-i tezüluba nung dena 1918 nungbo amshia tenzük nungji, iba dangji tama Naga nungertemi Naga yimten nüchiso temeten indang jembia liasü ta angatetter. Iba sülen Naga National Council tenzüka Naga yimten nüchiso asoshi India den kanga sashia raraogo. Ano, NNC tenzükba sülen NNC nungi razüka oa akümba NSCN teloka joko küm 30 ajunger. Iba ama küm noklang junga yimten nüchiso asoshi raraba tongpang ya tazüngla nung anentsüba tongpangbo masü. Ibai tesashiba tesashiba raraa aotsüla. Ajisüaka, shisabolutsü kaji küm noklang tsüngda Naga yimten nüchiso asoshi raraba tongpang nung samanir aser tanishirtem ajunga amato sümadagi. Yimten nüchiso mangu nungji rarabo manener saka taküm arishi agibo atatsü masünungji, mezüng Naga Club nung alirtembo ajak sümaogo aser NNC aser NSCN nung tanishirtema ka khen, ka khen ta  ajak sümadagi. Atangji, temoatsü kaji, arem nung machimajem süng tu aser ali dang mejaka, tetsübu agi ayipjanga amui moutet timtem aser tekangshi jentisa jenti ajurua taküm kümzüka aruba purtem süaka, Naga nunger linük tenzükertem rongnung tanishirtem kanga arishia litetter. Aji oda, tang NSCN-IM nung tadong tir, Gen(Rtd) Kholi arishi küm 90 nung asübajia kanga arishia liogo. Yamaji NNC tir A.Z.Phizo aser NSCN-IM nung tir Isak Chishi Swu na prongla kanga arishia liogo. Atangji, tesasatsüka Naga nunger linük tenzükertem tsüngda tsükchitepdang, yiar aser suwar mapa amai, asenok o asenok na tsüngda azü kanga tokshitepogo aser tapayutsü taküm aika samaogo. Aji oda, kar arishi matongdang aser kar arishia lir asür ta alima nungi Naga nunger linük tenzükertem ka sülen ka ta piladang, Naga yimten nüchiso asoshi raraba tongpang takok mangu atemer amai bilemer. Shitakba agi, yimten nüchiso tongpang yabo senmang amai mezüng purtem süaka ano tesüpurtemi nüchiso mangu tashi, obala senmang chirnuri amang amai, shitak raraa otettsüla. Ajisüaka, Naga yimten khuret yabo tanü asüng lanurtemi pei senmang amai bilema khuret mebentettsü amai bilemer. Akhi Naga nunger linük tenzükertemi pei asoshi kecha mebilem saka Naga nunger ajak asoshi yimten nüchiso jenjang ka latettsü atema pei taküm aser kibong ajak bendanga agütsü. Ajisüaka, tanübo lanurtem aikati pei lima aser nübortem asoshi yimten nüchiso bushir masü saka rongsen bushir. Naga yimten asoshi shisabolutsüji aji lir. Atangji, rongsenji ajak asoshi nüngdak saka nübortem aseshi yimten nüchiso bushiba den pei agitsü rongsen bushiba aser bendenba mapabo meputet. Iba jagi yimten nüchiso asoshi tongpang nung nokdakertem tezü atangtsü aser tongpangji tsükchir marudangyongi laoadoktsü. Asenok dak aketba item tashimaitbatemji meteta India government-i, ashiko, Naga yimten nüchiso bushiba mapa ya pasasa süadoktsü atar asü (?) ta bilemer. NNC aser NSCN nung lenir aika süogo saka ano aika anünga lir aser itemji tashi itshitsübaji kanga tongtibang lir. Joko, NNC aser NSCN nung tang teinyakdak tongti tanishirtema aika arishi tatembangleni arur, kechiyong yangi tekalen shisema aliba ama, arishi anogoi asenok matar. Aji oda, taruba küm ishika tsüngda tang telok balala nung lenirtem aika arishi agi matatet oadoktsü. Iba sülenbo Naga yimten nüchiso temeten indang züngzünga jembir malitsü. India government-i iba ama tia kaji atar asü (?) ta temulung melemi bilemer. Iba ama kümsa küm taila teimla agüja Naga nunger mesüshidaktsüba reprangteta, yakanü Nagaland GBs Federation teloki India ato kilonser dang Naga yimten nüchiso jenjang latettsüba tebilemtsü onük ya sangküm küm Lok sabha election matongdangsa latetdaktsüner ta ashibaji kanga shitak shiogo. Parnok den sema, NNC aser NSCN lenirtem mesümadang, lokti balalai ola adoktsü junger.