Rio aser Tokheho nati PM Modi den ajurutep

Dimapur, Luchii (December) 14 (TYO): Chief Minister Neiphiu Rio den Lok Sabha MP Tokheho Yepthomi nati December 13, 2018 nü Prime Minister Narendra Modi den ajurutep.
Parliament House, New Delhi nung senden amendang Rio-i Prime Minister dang Naga nungertemi Naga yimten tekaratiba nung latetnür ta ashi.
December 12, 2018 nü Nagaland Gaon Bura Federation (NGBF)-i Nagaland kübok district ajak nung Naga yimten tekaratiba nung latettsü atema takhangba agüja sentong ka agi aser Nagaland Governor ajanga Prime Minister nem memorandum ka agütsü, ta Rio-isa ashi.
Taoba Prime Minister asür Atal Bihari Vajpayee-i state yimtiba ajak nung airport alitsüla ta ashiba nung ajemdaker Kohima nung Ciethu Airport yanglutsü sentong atong, ta Nagaland CM-isa Modi dang ashi.
Silchar-Jiribam-Tupul-Imphal railway project dang nungibo Ciethu Airport project nung sen tajemba endoktsü. Ajisüaka, iba atema sen melemzüktsüba atema mepelar, ta paisa ashi.
Rio-isa Prime Minister dang taoba mapang SPA kübok state nem senotsü kar magütsüi aliba agütsütsü atema mepishi.
Mapatong kar tembangogo aser kar joko tatemer dang lir, ta paisa shisem.
Prime Minister-i onük ajak angadangba sülen Chief Minister aser Lok Sabha MP na dang pelaba metetdaktsü aser pai sendaktepa aliba ministry ajak den onüktem lemsateptsü nangzük.