PELAR

~ K.T. Imchen, Merhülietsa, Kohima.

Tir Yimyim O lemsabang nung asen Aor sempet tajung aketer aiekati tazüngertem ajangzükdakja onük balala nung ocet zülubatem temulung chia zünga arudagi. PELAR. Ni tawa züngshiba Ocettem rongnung “Waro or tempang koshir” (Nov. 9,10,11), “Ni ya angatetnür” (Nov. 18) aser “Mojingi mapa inyaker asü? (Dec.4) dena lir. Item rongnung tesübuba Ocet (3rd para, 4th sentence) azüngba sülen yabo ratettsütsü/jangjatsütsü nüngdak ta belemba agi ya zülur. Iba den külemi temalen zülurtemi shisemba O (point) ana den sentaktepa kü tangatetba ashinunga mapetbo masütsü ta bilema yamai zülur;
1. CTC nung Principalbai Hindu nunger tsüngrem tetzür (Goddess) indang züluba kaket ka salaba (“Ni ya angatetnür” & “ Mojingi mapa inyaker asü?”).
Iba ocet züluri tesayur tajungtemi ya yakta ratettsüra pelatsü ta o tajung agi mepeshi saka tanü tashi shiangaia osang kaket ajanga meratetsüba ajanga kodamali ni ya zülur (Ni theologian mesüra tesayur ka masü saka ni angashia aliba den tawa metetpela sür jangjashibaji yamai lir).
Theological college/university ajak nung MAJOR WORLD RELIGIONS ta sür subject ka agir ta ashir. Kechiba süra tanga yimsü (Hindu dena) amangertem dangi Khrista osang bener aotsü atema parnok tamangba (doctrine & belief) indang junga angateta mesüra meteta alitsü nungdaker. CTC nung tesayur Dr. K.D.Rai-i züluba kaket, koba kesa college Principalbai sayatsü, ibaji pa (Dr. Rai) doctorate ‘thesis’ liasü aser ibaji Serampore Theological University-i junger ta agizüker pa nem doctorate agütsü ta jangja-a angazüker. Ratatsüji tiem dang saka anasa aliba theologian ka dang asüngdang nung jangja-a angatettsü südi. Ano kaket ka indang jembidang kaket tenung (title) masü saka kaket nungji kechi zülua aliar(content) metettsü nungdaker.
2. “TEMESHI” Naga lima ayongtem nung Hindu nunger temang arongba mitsü indokba/Hindu külemkeja mapa inyakba (“Waro or tempang kosher” & “Mojingi mapa inyaker asü?”)
Taoba PM asür Vajpayee tasümang arongba mitsü Nagaland dena India tesem ajaklen prokbaji pa Hindu nunger asüba agi masü saka India Prime Minister inyaka aliba lenir ka asüba agi akhüm agüja aser linük asoshi temoatsü meshia inyakba liasü ta nibo bilemer. Temalena, tatishitsü agi, Indira Gandhi arongba mitsü Nagaland-ia bener arua indok ta ni angashia liasü. Jangjatsü atema tejen bangdakpur aser tanü temeteter kar den metetpela asünung ibaji shitak ta ashi. Hindu nunger asüba agi Hindu külemkeja süa arong aser indok sülaba. Khristanpurtem ka India Prime Minister inyakdanger asü nung Khristan külemkeja yimya amshitsü südi. Asenoki ya metetdi. Nagaland tesem palala, talisa town-tem nung, Hindu mesüra Muslim amangertem asüdang aieka asen ‘temeshi’ state nung par tamangba yimsü apia külemkeja süa rongdoker mesüra aremer. Iba anemaji Naga Khristan aser arogotemi anema menokdaker mesüra tai ta mashir kechiba süra Khristan masüba nisung ka mitsü mesüra tasümang asen state nung indokbajagi ‘temeshi’ Naga lima ayong mesüra ali memenentsür aser tanga tamangba yimsü külemkeja asübajagi asenoki amangba Khristan yimsü atema lendong kecha mali ta nibo bilemer. Asenoki belemdangdi- Naga nunger Khristan ka Hindu lima nung sür pei limai bener maruteti Hindu lima nungji aremtsüsa aküm nung ‘temeshi’ Hindu li menentsütsü aser Hindu yimsü atema lendong asütsü, ‘MEMELAR’ ta süadokra koda? Temalen Tir Yimyim yimobelem zülu ka nung mitsü bener aruba nungji tai kecha mali saka ibaji Khristan kati Hindu külemkeja süa indokra tai asütsü ta züluba züngshir nia shitak ta bilema liasü. Tanabuba nung mitsü indokba külemkejaji Dimapur nung alir Hindu putirtemi inyak ta English local paper kar nung adokba nia züngshi.
Asembuba nung mitsü bener arubaji Naga nunger Khristanba nija masü saka state BJP President ama pa nem nungloktsüba mapa inyakba asütsü.
(Maneni taruba adok nung…)