Mkg nung Night Carnival atema traffic tetuyuba agutsür

Mokokchung, Luchii/December 15 (TYO): Luchii/December 20, 2018 nungi December 22 anogo tashi Mokokchung jila nung “Night Carnival” alitsü, aser iba dak sendakba nung Mokokchung Superintendent of Police-i nüburtem nem traffic tetuyuba kar metetdaktsüogo.
Adventure & Motorsports Association Mokokchung aser Mokokchung District Musician Association-i Mokokchung jila nung Town tiyong (Police/Point) nungi Rotary House junction tashi “Night Carnival” ayongzüker, anungji aonung 5:00 ako nungi 10:00 ako tashi iba tesem nung gari senzüsembongba tenokdangba alitsü, ta ketdangserisa metetdaktsü.
Jila nung gari senzüsembongba nung timtem malitsü atema temalen shia aliba mapang nung Police Point nungi Rotary house tashi gari senzüba melematsü, aser Tongdentsuyong/Alongmen nungi aruba garitemji Main Police Point nungi tangaleni yoktsü.
Ano Yimyu/Khensa nungi jila tiyongtsüleni aruba garitemji Jubilee Memorial School junction/Model Higher Secondary School junction (Milak river junction) nungi Dilong ward tsütsüleni aotsü metetdaktsür.
Maneni local ground side/area nungi jila tiyongleni aruba garitemji D.C hill junction – Ao Senden Office – Police Point leni arutsü metetdaktsür, mesüra gariji Rotary point len nungi tangaleni meyiptsüla.
Ajisüaka kodamasüba duty garitem- ambulance, fire tender aser police garitemji iba (Police Point nungi Rotary house) lenmang ajangtsü melatsü, ta kasa osang ajanga metetdaktsü.