Messi asaya nungi manen tsüngda India nung asayatsü imlar: Camps

Luchii/December 15, 2018 (Agencies): FC Barcelona’s Asia Pacific director general Jordi Camps-i, Lionel Messi asaya nungi manendangsa Catalan club preseason asaya kabosa India nung asayatsü imlaba lemsatepa liasü.
Paisa, mapang tatsüka tsüngda India nunger asayar kabosa Spanish top-flight nung asayaba angutsü, ta ashi.
La Liga club Girona FC pur taküm Kochi nung exhibition tournament ka nung asayaogo.
Barcelona pur India nung asayatsüba indang asüngdang dang, ketdangeri kanga temulung lema bilemba lemsatep.
“Ni India ya iba market nung tongtibang shilem agiba linük ka lir aser Barcelona o Hong Kong nung ozü team-i India nung fan tem atema iba maongka bener arutsütsü asoshi sentong yangludar,” ta Camps-i ashi.
Paisa, “iba sentong ya taruba küm mesera taruba taruba küm ataloktsü mataloktsü memetet saka onoki Barca team anir arutsü. Ita ana tejakdang onoki legends tem anir aruogo aser India nung onok school-a lir anungji tanem tanemi onok arudar saka Messi asaya nungi manendangsa iba sentong ataloktsü ni imlar,” ta ashi.
FC Barcelona nungi taoba mapang nüngtugu asayartem Kolkata nung Rongjui/Sept nung friendly ‘legends’ asaya ka taoba Mohun Bagan asayartem den asayaogo.
Camps-isa, tarutsü nung Asia linük tem ya football asayaba tesem tongtibangtiba tem rongnung züngoksemtsü ta amanger.