Zoramthanga-i CM inyaktsü tezüngzüktep agi

Aizawl, Luchii (December) 15 (Agencies): Mizo National Front (MNF) president Zoramthanga-i tanü Mizoram nung chief minister tasen inyaktsü atema tezüngzüktep agiogo.
Raj Bhavan, Aizawl nung sentong ka nung Governor K Rajasekharan-i pa nem tezüngzüktep agidaktsü.
Zoramthanga-i Mizo oshi nung tezüngzüktep agi aser züngsem 12-i akümba ministry aküm.
Zoramthanga-i tang agi tasembenbuba Mizoram nung chief minister inyaktsü. 1998 aser 2003 nung MNF sorkartemi yimsü asüdang pai chief minister inyak.
Tanü Zoramthanga den züngsem 11- cabinet 5 aser minister o state 6 tashi tezüngzüktep agi.
Cabinet minister punguji – Tawnluia, R Lalthangliana, Lalchamliana, Lalzirliana aser Lalrinsanga nungertem lir aser ministers of state temji- K Lalrinliana, Lalchhandama Ralte, Lalruatkima, Dr K Beichhua, TJ Lalnuntluanga aser Robert Romawia Ralte lir.
Mizoram Kohhran Hruaitute Committee (MKHC) nung Chairman Rev R Lalhmingthanga-i Laishiba nungi lai ka azüng aser sarasademtsü. MKHC ya Mizoram nung arogo tulu 16 lokteper tentetba telok lir.
Taküm state assembly election nung MNF-i assembly menden 40 nungi 26 nung takok angu.