APO-i asür Gen. (retd) Khole Konyak nem tetushi agütsü

Kohima, Luchii (December) 15 (TYO): Bodbarnü New Delhi nung asüba asür General (retd) Khole Chetkoh Konyak indang mang tanü state yimtiba adena bener ao.
NSCN(IM) indang General Headquarters- Camp Hebron nung tanep sentong tatsüka agiba sülen asür Kholi indang mang Mon district kübok par tasoyim Wangshu yimtsüng-i bener ao.
NSCN(IM) lennirtem meina pa mang bener aoer aser Kohima, Tseminyu, Wokha, Mokokchung, Tamlu, Wakching, Mon, Aboi aser Tobu nung anenzüka aoba sülen tatemsa Wangshu nung pa den asüpila sentong agir pa mang aremtsü.
Kohima nung Angami Public Organisation (APO)-i Old MLA junction nung sentong ka ayonga agi.
APO tenüng nung vice president Kevilezo Savi-i o jembidang, “Asür Kholi Konyak ajungbena asüba atema APO-i mang ayimer. Pa ta ya nokinketer aser lennir tajung ka liasü” ta ashi.
Küm 60 dak tema pai Naga nüjiso atema inyaka aru aser pa asübaji Naga loktiliba ajunga atema takoksa tulu lir. Naga linük atema pai bendanga agüja inyakba ama nisung aikati meinyaktettsü, ta paisa ashi.
“Pai Naga lima atema taküm bendanga agüja inyakba mapatem tang aser teti bilemtettsü” ta APO lennirisa shisem.
Angami Youth Organisation (AYO) general secretary, Kekhrie Pfukha-ia o jembidang, asür Kholi Konyak ya Naga nunger lennir tajung ka liasü aser mapa balala inyaka aruba sülen May 19, 2017 nü NSCN(IM) nung vice chairman inyaktsü atema tezüngzüktep agi, ta ashi.
“Asür Kholi Konyak ya chichiba linük meimer ka liasü aser pai mapa tajung inyakbatem kodanga mamatettsü” ta paisa shisem.
Konyak Union Kohima president, Dr W Phola Konyak-ia “Asür Kholi Konyak-i linük atema bendanga agüja mapa inyakbatem Naga nungeri kodanga mamatsü” ta ashi.
Mapang talangka pai Naga yimten latettsü atema inyaka aru saka pa taküm lia ibaji metongtetba atema sasar, ta paisa shisem.
Social activist aser NNC lennir, Kaka D Iralu-ia ashiba agi, “Asür Kholi Konyak-i tejaklen nungi Naga nunger ani aser general jenjang atong. Pai National Defence Academy nung takok anguba atema masü saka Naga lima atema timtemba aser kangshiba ajanga general jenjang angu.”
Sentong nung Rev Fr Peter Pithungo-i tasür tanüla atema sarasademtsü aser Konyak Baptist Church Kohima Pastor, H Moba Konyak-i Kohima nungi yimtsüng matong tashi mang bener aotsü atema temoatsü meshia sarasademtsü.