NPF Legislature Party-i Naga yimten tebilemtsü atema inyaktsü

Dimapur, Luchii (December) 15 (TYO): December 15, 2018 nü NPF Legislature Party leader T.R Zeliang’er kidang senden ka amen
Senden nung NPF Legislature Party-i NSCN/GPRN nung Vice-President asür Gen. (Retd) Khole Konyak asüba atema mang ayim aser tasür kinungertem aser NSCN/GPRN züngsem ajak den asükhu lemsatepba metetdaktsü.
NPF Legislature Party-i maneni Indo-Naga yimten tebilemtsü latettsü atema inyaktsü aser Prime Minister, Narendra Modi kübok India sorkari 2019 Lok Sabha elections matongdang telemtetba ka agitsü ayonzgüker, ta NPF Legislature Party-isa metetdaktsü.
13 buba Nagaland Legislative Assembly mapang BJP-i ‘Election for Solution’ yimyim nung shilem agi saka parnoki sorkar kümer küm ka süiaka Naga yimten tebilemtsü atema ola madoker, ta parnokisa shisem.
Naga Movement nung lennirtem aser mezüngpurtem parnok taküm lia Naga yimten latettsü imlaa lia ka khen ka ta asür. India sorkari kobika iba tebilemtsü metembangi yutsütsü? Teti atema yimjung angutsü atema India sorkar aser Naga Nationalist Groups ajaki tekaratiba nung angatetteptsü mepishir, ta NPF Legislature Party-isa metetdaktsü.
NPF Legislature Party-isa India sorkar dang NSCN-K lennirtem Ceasefire Agreement nung sign asütsü atema jaoktsü aser olemtep nung dendaktsütsü ayongzüker, ta parnokisa shisem.