Naga Club-i tenüngsang agütsüba sentong ka agi

Dimapur, Luchii (December) 15 (TYO): Naga Club tenteter küm noklang ka ajungba atema tenüngsang agütsüba sentong ka tanü agi.
Sentong nung Finance Secretary, Naga Club Kuolachalie Seyie-i o jembidang, “Tashi alirtemi Naga nunger madak yimsü asür. Asen oboula nungertemi tamakok anguba senmang asenok nem meyutsü aser iba atema asenok nüma tangteter” ta ashi.
1929 küm British Statutory Commission dang Naga nunger shinga kübok masü ta Naga Club-i shitetba agi tanü iba reju ya kanga tongtipang lir. Anungji, Naga nungertemi asen tarutsü atema alizüng yur mapa inyaktsü ayongzüker, ta Seyie-isa ashi.
Anogo piyong agiba sentong nung Social Activist & Advisor, Naga Club Niketu Iralu, Kohima Lotha Baptist Church Pastor Rev. Dr. Benry Lotha aser Nagaland Joint Christian Forum President & General Secretary, Nagaland Baptist Church Council Rev. Dr. Zelhuo Keyho nungertemia o jembi.
Sentong nung taoba Minister Seyiekuolie Kesezie, Retd. Director SCERT Vipralhuo Kesezie, taoba MP & taoba caretaker, Naga Club Khyamo Lotha, taoba Naga Club, Joint Secretary Kewezu Mero aser Nagaland Contractor’ Suppliers Union President Pele Khezhie nungertem aden.
Sentong nung mendenji Secretary, Naga Club S. Peter Trakha liasü, Rev. Dr. Benry Lotha-i temoatsü meshia sarasadem, Organizing Committee of Centenary Celebration Convener Medoselhuo Keretsü-i tepela o jembi aser Calvary Baptist Church, Jotsoma Pastor Rev. Kelhuseto Nagi-i tenüngsang agüja sarasadem.