PM ka ama ni osangbenertem den jembitsü metsübu: Manmohan Singh

New Delhi, Luchii/December 19 (Agencies): Ato kilonser, Narendra Modi aitsüba olen ka nung tanü Congress Party lenir aser taoba mapang Ato kilonser, Manmohan Singh-i, ni osangbenertem den jembitsü atema kodanga metsübu, ta metetdaktsü.
Dr Singh-i, “Ni ola madokba Ato kilonser ka liasü ta nisungtemi jembir. Ni amanger, iba kaket (‘Changing India’) ajanga aika ashitsü. Ato kilonser ka ama ni osangbenetem den jembitsü metsübu. Ni mapang shia osangbenertem ajuru aser ni bendang linük semdangba mapang osangbenertem den jembi aser meyipa aruba sülena osangbenertem senden ayongzüka jembi,” ta ashi.
Manmohan-i züluba kaket “Changing India” sayaba sentong nung jembidang pai item o ya jembia liasü. Iba kaket nungji pai Economist ka ama pa taküm otsü ashiba den külemi pa leniba kübok Congress-i aniba United Progressive Alliance (UPA) sorkari küm 10 yimsüsüba indang shia lir.
Paisa 2005 küm ketdangsertemi pa dang Washington nung National Press Club-i ayongzükba osangbenertem senden nung mejembitsü asüngdangba indang shia lir. Pai ashiba agi, ketdangsertem tsübua liasü ajisüaka osangbenertem sendenji kanga takok ngua agi.
Tang Central bank aser sorkar ana tsüngda mangatettep aliba dak sendakba nung Dr Singh-i, sorkar aser RBI na tesendaktepji kinüngtsü aser kinüngbu na tesendaktep amai lir, anungji tangatetba balalaji tekaraba nung bentettsüla aser reju anati angatettepa inyaktsüla, ta ashi.