Lok Sabha nung Surrogacy (Regulation) Bill 2016 agizükogo

New Delhi, Luchii/December 19 (Agencies): Tanü Lok Sabha nung Surrogacy (Regulation) Bill 2016 agizükogo; iba bill ajanga India nung surrogacy ozüng melenshia Central jenjang nung National Surrogacy Board, state aser UTs nung State Surrogacy Boards den Appropriate Authorities amenoktsü.
Iba ozüng ajanga surrogacy telatetbatem yanglushitsü, commercial surrogacy nokdangtsü aser altruistic surrogacy temelaba agüja India nunger tanur malirtem nem iba maongka agutsütsü.
Kodang iba Bill ya Parliament nung agizüka inyakdir sorkari tetuyuba agutsüba sülen ita asem tsüngda National Surrogacy Board tentettsü. States aser Union Territories nung State Surrogacy Board aser State Appropriate Authorities tentettsü.
Iba Act ya ajanga linük nung surrogacy services yanglushitsü aser surrogacy dak sendakba nung tim masüba mapatem nokdangtsü, surrogacy dak sendakba nung senotsü ajangzükba nokdangtsü aser surrogate tetsürtem den surrogacy ajanga asoba tanurtem anema inyakba mapatem nokdangtsü.
Commercial surrogacy nokdangtsü aser iba nungji meimchir embryo aser gametes ayokba mesüra alizükba nokdangba densema lir.
Tanur memoaba India nunger apuanitem iba Bill ajanga ajangzüktsü, iba dak alia surrogate tetsütem aser surrogacy ajanga asoba tanurtem temeden ajak kümzüka ayutsü.