Modi leniba nung Lok Sabha election nung tokteptsü: Amit Shah

Mumbai, Luchii/December 19 (Agencies): Tanü Bharatiya Janata Party (BJP) Tir, Amit Shah-i, 2019 Lok Sabha elections nung NDA-i Ato kilonser, Narendra Modi leniba nung tokteptsü, ta metetdaktsü.
‘Surging India’ “Republic TV” summit nung jembidang Shah-i, “Lenir memelentsü. 2019 election nung NDA aser BJP-i Modi lenisüba nung tokteptsü. Onoki majority ajanga takok angutsü,” ta metetdaktsü.
“2014 küm election mapang nung state trok nung BJP sorkar liasü, ajisüka tangbo state 16 nung BJP sorkar lir. Anungji shibai akoktsü?” ta pai asüngdang.
Maharashtra nung aluyimertem tentet Vasantrao Naik Sheti Swavalamban Mission (VNSSM) nung Chairman, Kishore Tiwari-i RSS tongti, Mohan Bhagwat aser general secretary Bhaiyyaji Suresh Joshi na dang, BJP-i takok ngunüra Modi masü saka Nitin Gadkari shimtsüla, ta ashiba o dak sendakba nung Shah-i iba o ya jembiogo.
Shah-isa, state aser central elections ji onük balala nung tokteper, aser 2019 elections ji India nung tokteptsü, ta ashi.
BJP Tirisa, tongtibang onüktemji ochimashi, linük security, alima nung linük jenjang ajungketba aser tensa tajungba akumba asütsü, ta ashi.
Pai ashiba agi, taruba elections ji, BJP-i aniba sorkari sensakertem taküm jenjang ajungkettsüba, gas connections crore pongu, metsümeshidak crore 8, light connection crore 2.50, ki crore 2.50 yanglutsüba, nisung crore 50 atema medical security, kibong shia nung bank account aliba densema tesüiba küm pezü nung sorkari inyaktsüba mapa aika densema lir, aser item nungji ajemdaker election nung tokteptsü.
“Iba dak alia tesüiba küm pongu nung iba sorkar anema ochimashi tai tongloktsüba ka danga maliasü,” ta pai ashi.
Lok Sabha election atema Opposition party temi ‘Mahagathbandhan’ teloktep yangluba dak sendakba nung Amit Shah-i, iba teloktep nungji state aser regional lenirtem timba lir, anungji ibaji ajanga state aika mekongshitsü, ta ashi.