Obendangeri Trump tembar Flynn teimla samatsür

Washington, Luchii/Dec. 19 (Agencies): Michael Flynn-i tiazü jembi aliba ngutetbatem US District Judge Emmet G. Sullivan-i minute ti agia ola tulu adoka zünga, Tir Trump indang national security adviser White House telungzük nung alidang FBI agent tem ashioktsütsü merang, ta ashi.
Special counsel ajanga bushisüngdangba nung sepai tanishir nungi anener alisang Flynn ya Trump den yariteper aibelener rongnung temaba jenjang nung alir ka lir, aser pai aibelena inyakba mapatem obendangeri zünga ashidang pa tejak makümer angaa liasü.
Flynn busemer mesüra Trump-i Sangtennü okadak iba amai akümtsü meimlai liasü. Nisung aikati Sullivan dak teimla akaba zülu, shiba kanga teindang nisung ka lir. Flynn-i aibelenba ya züdoktsü akok, ta pa tembartemi bilema liasü.
Saka arishi küm 71 tain, Sullivan-i pa indang sabang amshia Flynn inyaksangshi nung mangatettep aliba samaja shiogo. Pa linük dang mapa tamajung inyaker court ajanga azüokba tongmelang agi rasaa shia, FBI dang tiazü jembiba ya ozüng alema lir, ta metetdaktsü. Ozüng raksabaji tamajung. White House nung inyakertemi tematiba jenjang nung litettsüla, ta Sullivan-i ashi.
“Iba aibelen ya kanga tulu lir,” ta pai ashi.
Pai pa menden tsülen America nunger nisan songa aliba nung temeyong tulukja sepai tejen, Flynn dang, “Nai nür linük yokogo,” ta ashi.
Sullivan-i okadak ain adoka Flynn artsüba aser tepuokdaki yoktsü mulunga lir ta ashiba ya mapang talangka nungi bushisüngdanga aruba ken o atema jangratemtsüka liasü, aser iba ajanga special counsel ajanga bushisüngdangba süoki ia agizüktsüla ta sayuba mapang ka liasü.
Iba mapa ya Sullivan-i meshidak inyaker ketdangser nem tatok magütsüba yimya ka lir, ta iba court nung aliba lawyer kati ashi.
“Judge Sullivan-i okatsürtem nem süoki ia mapa inyakdaktsü, aser aji parnoki aibelen mapa inyakba agi masü, saka pai sorkar mapa temaba jenjang nung inyaker,” ta taoba mapang federal prosecutor inyaka alisang, Glenn Kirschner-ia ashi.
“Saka tanü met pur asishi majung liasü. Kechiaser met ya temaba jenjang nung sorkar ketdangser ka liasü, shibai aibelen mapa inyak. Anungji Judge Sullivan-i met dak pa ain teploktsü,” ta Kirschner-isa ashi.
Mueller’er telok nem Flynn-i osang peria magütsüba atema Sullivan mit adoka liasü. Taoba mapang national security adviser inyaksangi pa indang ken o bushisüngdangba mapang tapet nung yaritepa liasü, ta special counsel ajanga ita tetenzüklen shiaka, pai tashi angaba tejangja memeteti Flynn nem obendang agütsütsü tasak, ta Sullivan-i ashi.
Sullivan ya Washington nung aliba US District Court nung federal judge mapa talangtiba inyaker ka lir, shiba 1984 küm Tir Ronald Reagan-i local D.C. Superior Court nung shimoka liasü. Pa ya Tir George H.W. Bush ajanga D.C. appeals court nung shimok aser Tir Bill Clinton ajanga federal court nung shimok.
Sullivan ya kangadang tetemjen obendanger ka lir aser 2016 nung election magidang pai Democratic candidate, Hillary Clinton-i secretary of state mapa bena lia la nija atema email amshiba kanga sashia aija lir.
Aenjeti/January 2017 nung Flynn okatsür aser Mueller’er teloki FBI den sensaksemba recording shibanga ayutsü asoshi Sullivan-i taoba hopta totuyuba agütsüdang Trump tembartem kanga pelatepa liasü.
Tir densema Flynn tembartemibo Sullivan ya FBI ajanga mapa meshidak inyakba kuli bushir südi, ta bilema liasü.
Sullivan-i obendang agütsü, saka parnoki imlaa aliba ama masü.
“Pa ya sorkar ketdangser temaba jenjang nung liasü, shibai United States tir nem shisalen sayu. Iba aibelen asoshi ni maksütsü metsübur,” ta Sullivan-i court nung ashi.
Iba ken o ya maneni Metsüremi/March nung jembitsü.
Sangtennü obendang agütsüba nung, Flynn-i Aenjeti/January 4 nungi tenzüka temelaba melie Washington nungi mile 50 dak tali maotsü, ta shia lir aser pa indang passport tema court nem agütsütsü.