Kevi tepsetba State Angh-i aitsür

Kohima Luchii/December 19 (TYO): December 18,2018 nü lenir, Kevi Zakiesatou ajungbena asüba atema Nagaland Angh, PB Acharya-i mangyimba lemsatepogo, ta tanü PRO to Governor sangdong ka ajanga metetdaktsü.
Angh Acharya-i, asür Kevi Zakiesatou-i nübur lenir ka ama menden balala nung Dimapur aser state nüburtem ajungtsü atema tenzüka aruogo, pa asüba ya state nüburtem atema takoksa tulu aser pai inyakba mapa tajungtemji ajaki bilemtettsü, ta metetdaktsü.
Nisung tepsetba sashia aija Angh-i ozüng amba agency tem dang mangyimba kibong nem ochi temeden agutsütsü atema aibelenertemji aputsü mepishiogo.
State Angh-isa, ochi temeden agutsütsü atema state sorkar machineries-i akokba tashi inyaktsü imlar, ta metetdaktsü.
Angh-i, mangyimer kibong züngsem ajak den mangyim jashi lemsatepba den külemi mangyimertem nem tashi tasen den tesünep agüjang ta Tsüngrem dang sarasademtsür, ta lemsatep.